«Ինչո՞ւ Սերժ Սարգսյանը կորցրեց համբերությունն ու օր առաջ արեց այդ կարևոր հայտարարությունը. կար պատճառ»

ԱԺ հայտարարությունների ժամին ընդդիմադիր պատգամավոր Նիկոլ Փաշինյանն անդրադարձել է Սերժ Սարգսյանի այն հայտարարությանը, որտեղ ասել է. «Այո, ես այսօր էլ չեմ հավակնում վարչապետի պաշտոնին։ Բայց ես նախապաշարումներով կամ քարացած մտածողությամբ առաջնորդվող մարդ ինձ երբեք չեմ համարել։ Ես չեմ կարող հաշվի չնստել իրականության հետ և համարել, որ չունեմ պատասխանատվություն ապագայի և ժամանակի մեջ մեր երկրի սահուն ընթացքի համար... Չգիտեմ այս քննարկումները երբ կավարտենք։ Բայց եթե ի վերջո որոշենք, որ առաջադրվելու է իմ թեկնածությունն, ապա դա կլինի իմ կողմից մեկ հավելումով՝ առ այն, որ սահմանադրական լիազորությունների ամբողջական իրականացմանը զուգահեռ ավելի շատ ժամանակ եմ հատկացնելու երիտասարդ քաղաքական լիդերներին մեր երկրի անցած տարիների երևացող ու չերևացող ողջ փորձը փոխանցելու գործին»: Նիկոլ Փաշինյանը հայտարարել է, որ դա տակտիկական անհաջողություն էր Սերժ Սարգսյանի ու ՀՀԿ-ի համար, որովհետև ի սկզբանե ամեն ինչ արվում էր, որպեսզի վարչապետի թեկնածուի հետ կապված ինտրիգը մինչև վերջին պահը պահվի, այնպես, որ տեսականորեն հնարավոր դառնա ապրիլի 16-ին թեկնածու առաջադրել, իսկ 17-ին անաղմուկ ընտրել: «Ինչո՞ւ, այնուամենայնիվ, Սարգսյանը կորցրեց համբերությունն ու օր առաջ արեց այդ կարևոր հայտարարությունը: Սրա համար կար կարևոր պատճառ: 2018-ի ապրիլի 9-ին նա լքելու է իր այսօր ունեցած կարգավիճակն ու մինչև 17-ը որևէ պետական կարգավիճակ ու պաշտոն չի ունենալու: Միևնույն ժամանակ ամսի 9-ին հրաժարական է տալու կառավարությունը: Սա նշանակում է, որ ունենալու ենք բացառիկ իրավիճակ 3-րդ հանրապետության պատմության մեջ, երբ մի ամբողջ շաբաթ ՀՀ-ում, ըստ էության, գործող գործադիր իշխանություն չի լինելու: Կարծում եմ, որ Սերժ Սարգսյանին նման վաղաժամ հայտարարություն անելը մղել է իրավիճակի նկատմամբ հսկողությունը կորցնելու մտավախությունը»,- ասաց Նիկոլ Փաշինյանը: