Հայաստանում հերթեր են եղել Ռուսաստանի նախագահական ընտրություններին մասնակցելու համար

Երևանում՝ Ռուսաստանի դեսպանատան, Գյումրիում՝ Ռուսաստանի հյուպատոսարանի առջև հերթեր են գոյացել Ռուսաստանի նախագահական ընտրություններին մասնակցելու համար:Մարդկանց անվճար տրանսպորտով տարբեր քաղաքներից տեղափոխել են ընտրատեղամասեր: Ընտրությանը մասնակցում են նաև հայաստանցիներ, ովքեր Ռուսաստանի քաղաքացիություն ունեն: «Ազատությունը» նկարահանել է նաև մի զույգի, որը ընտրատեղամաս էր եկել իր պսակադրության օրը: Երևանում ընտրատեղամասը գտնվում է Հայաստանում Ռուսաստանի դեսպանատանը: Բացվելուց մեկ ժամ հետո արդեն դեսպանատան առջև հերթեր գոյացան: Քաղաքացիները ստիպված էին մոտ մեկ ժամ սպասել քվեարկելու համար: Քվեաթերթիկների համար ծրարներ նախատեսված չէին: Երբ քաղաքացիներից ոմանք քվեաթերթիկը նետում էին թափանցիկ քվեատուփի մեջ, կարելի էր տեսնել, թե ում օգտին են նրանք քվեարկել: Հայաստանում Ռուսաստանի դեսպան Իվան Վոլինկինը «Ազատությանը» փոխանցեց, որ ժամը 15.00-ին դրությամբ արդեն քվեարկել էր շուրջ 3 հազար մարդ: Աղբյուրը՝ Ազատություն