Սերժ Սարգսյանի ցանկությունը օրենք դարձավ

«Բարձրագույն կրթության մասին» կառավարության առաջարկած օրենքի աղմկահարույց նախագիծն այսօր երկրորդ ընթերմամբ քննարկման էր բերվել ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովում։ Ինչպես հայտնի է այս օրենքի առանցքային նպատակն այն էր, որպեսզի ապաքաղաքականացվեն բուհերի կառավարման խորհուրդները, եւ պետական իշխանության ներկայացուցիչները հնարավորություն չունենային դառնալ խորհրդի անդամներ ինչպես, որ այսօր է։ Հայտնի է, որ բարձրաստիճան պաշտոնյաներից շատերը տարբեր բուհերի անդամներ են հանդիսանում, Սերժ Սարգսյանն էլ Մայր բուհի՝ Երեւանի պետական համալսարանի խորհրդի անդամ է, ԵՊՀ հոգաբարձուների խորհրդի ղեկավար։ Նշենք, որ ներկայացված օրենքի առաջին տարբերակում բացառվում էր քաղաքական պաշտոն զբաղեցնող անձանց ընգրկումը բուհի խորհրդի կազմում: Սակայն երկրորդ ընթերցման ժամանակ առաջարկ է արվել՝ եթե ԲՈւՀ-ի խորհուրդը կազմված է 10 անդամից, ապա նրանցից 1-ը կարող է լինել քաղաքական պաշտոն զբաղեցնող, 20 անդամի դեպքում` 2-ը: «Ելք» խմբակցության պատգամավոր Արարատ Միրզոյանը դեմ էր այս առաջարկին: «Օրենքում մի լավ բան կար, դա էլ եք ուզում փոխել: Քաղաքական պաշտոն զբաղեցնող անձինք չպետք է լինեն բուհերի խորհուրդներում: Միջազգային կառույցների ասածն էլ չի կարող իմպերատիվ լինել մեզ համար: Հիմա «լազեյկեք» եք փնտրում»,- ասաց նա: Պատգամավորը շեշտեց, որ, իհարկե, ձևական էլ կարող են միջամտել ԲՈւՀ-ի աշխատանքներին, բայց գոնե իրավական ձևով կարգավորում կլինի: Ուշագրավ է, որ առաջարկին կողմ էր նաև հանձնաժողովի նախագահ Վարդան Բոստանջյանը: «Այդ սահմանափակումը չպետք է լինի: Այդպիսով` անհրաժեշտ մարդկանց կարող է չկարողանանք խորհրդում ներառել»,- ասաց նա: Նկատենք, սակայն, որ այլ կերպ հնարավոր էլ չէր պատկերացնել, քանի որ անցած տարի Սերժ Սարգսյանի՝ ԵՊՀ-ում արված հայտարարությունն իրագործելու խնդիր կար։ Խնդիրն այն է, որ ուսանողի այն հարցին, թե արդյոք նախագահական ընտրություններից հետո Սերժ Սարգսյանը, անկախ ստանձնած պաշտոնից, կշարունակի ղեկավարել ԵՊՀ հոգաբարձուների խորհուրդը, նախագահը նշեց. «Սիրելի՛ համալսարանականներ, անկախ ամեն ինչից՝ ես չեմ հրաժարվելու Մայր բուհում և Շախմատի ֆեդերացիայում ստանձնած պաշտոններից»: Ստացվում է, որ օրենքը հարմարեցվում է Սերժ Սարգսյանի ցանկություններին։ Նշենք, որ օրենքի վիճահարույց դրույթներից մեկն էլ 70 տարին լրացած անձանց գիտամանկավարժական գործունեությամբ զբաղվելու հնարավորության սահմանափակումն էր, ինչը նախատեսվում էր նախագծի նախնական տարբերակով: Այն ըստ էության մնաց նույնը՝ ամբիոնի վարիչի աշխատանքը համարվում է հիմնական աշխատանք եւ այդ պաշտոնում ընտրված անձը չի կարող զբաղեցնել այլ պաշտոն: Կառավարությունը նաեւ համաձայնել է` ռեկտորների եւ ամբիոնի վարիչների համար կենսաթոշակային տարիք կսահմանվի 65 տարեկանը: Առաջարկվում էր համապատասխանաբար 70-ը եւ 63-ը: Անի Սահակյան