Ինչ անում ենք, էրեխեքի համար ենք անում
ԱԺ պաշտպանության եւ անվտանգության հարցերի մշտական հանձնաժողովն այսօր երկրորդ ընթերցմամբ միաձայն «կողմ» քվեարկեց ՀՀԿ-ական պատգամավոր Միհրան Պողոսյանի առաջարկած նախագծին: ՀՀԿ-ական պատգամավորն առաջարկում է լրացում կատարել «Զինվորական ծառայության եւ զինծառայողի կարգավիճակի մասին» Հայաստանի Հանրապետության օրենքում, որով օտարերկրյա պետություններում դպրոց հաճախող ՀՀ արական սեռի ներկայացուցիչներին թույլատրվի ավարտել դպրոցը, հետո միայն մտածել զինվորական ծառայության մասին: Առաջինից երկրորդ ընթերցում ընկած ժամանակահատվածում ոչ խորհրդարանական խմբակցությունների, ոչ էլ կառավարության կողմից առաջարկ չի ներկայացվել: Ավելի ճիշտ՝ կառավարության մեկ առաջարկը՝ տեխնիկական ձեւակերպումների հետ է կապված։ Ընդդիմադիր «Ելք» խմբակցության պատգամավոր Սասուն Միքայելյանը հետաքրքրվեց` տարկետո՞ւմ ենք տալիս: Միհրան Պողոսյանը պարզաբանեց` խոսքը հանրակրթական ուսումնական հաստատություններում սովորողներին է վերաբերվում, ոչ թե բարձրագույն: Գործող օրենքը այդ հնարավորությունը տալիս է Հայաստանի հանրապետության հանրակրթական հաստատություններում սովորողներին`ավարտել դպրոցը նոր մտածել զինապարտության մասին: Բայց արտերկրում սովորող երեխաներին դա չէր վերաբերում: Սասուն Միքայելյանը շարունակեց` եթե երկքաղաքացիություն ունե՞ն ու, ասենք, ուզում են ծառայել ՌԴ-ում, հիմա էլ ԵԱՏՄ անդամ ենք. «Բա էս հարցերը ո՞նց են լուծվելու»: Հանձնաժողովի նախագահ Կորյուն Նահապետյանը պատասխանեց՝ ասելով, որ համապատասխան օրենքներով այդ հարցը լուծված է`ՀՀ քաղաքացիները պարտավոր են ծառայել ՀՀ զինված ուժերում: Եթե այլ երկրի քաղաքացիությունն ավելի վաղ էին ձեռք բերել, այդ հարցն էլ է կարգավորվում: Օրենքում նման լրացում կատարելու նպատակն արդյոք այն է, որ իր Քեթրինի Միհրանի որդին սովորելու է օտարերկրյա դպրոցում հարցին պատգամավորը ավելի վաղ անկեղծորեն պատասխանել էր․ «Ես այս նախագիծը նաև ձեր երեխաների համար եմ ներկայացնում: Մենք պետք է հասկականք մի բան, որ պետք չի մասնավորեցնել դեպքերը: Խնդիրն այն է, որ 18 տարին լրացած տղաների մի զանգված, որոնք սովորում են օտար ափերում, ՀՀ քաղաքացի են, բայց չավարտելով դպրոցը խնդիր են ունենում բանակ գնալու հետ: Հայաստանում սովորողները չունեն այդ խնդիրը, որովհետեւ նրանց տարկետում է տրվում»։ Հետաքրքիր է, թե ում համար էր «կողմ» քվեարկում ազատամարտիկ Սասուն Միքայելյանը, ում համար, փաստորեն, երկրի պաշտպանության հարցը ստորադասվում է իշխանավորների զավակների ապահովությանը։ Անի Սահակյան
Հետևեք մեզ Viber-ում
