Փայլանը զայրացել է

Ինչպես հաղորդում է թուրքական Gazete Duvar լրատվամիջոցը, Թուրքիայի մեջլիսում քրդամետ Ժողովուրդների դեմոկրատական կուսակցության պատգամավորներ Նուրսել Այդողանի, Ահմեթ Յըլդըրըմի և Իբրահիմ Այհանի՝ պատգամավորական մանդատից զրկվելուց հետո քրդամետ կուսակցության անդամների թիվը մեջլիսի բյուջետային հարցերով հանձնաժողովում նվազել է 3-ի (Գարո Փայլան, Էրթուղրուլ Քյուրքչյու, Բեդիա Օզգյոքչե Էրթան): Ընդ որում, հեռացած պատգամավորների փոխարեն տեղեր են հատկացվել «Ազգայնական շարժում» կուսակցությանը: Մեջլիսի հայազգի պատգամավոր Գարո Փայլանը, ով բյուջետային հանձնաժողովի անդամ է, իր դժգոհությունն է հայտնել հանձնաժողովում անդամակցելու իրենց իրավունքը ազգայնականներին փոխանցելու փաստի առնչությամբ: «Մենք այստեղ ժողովրդի կամքն ենք ներկայացնում: Եթե դուք ժողովրդի մի մասի կամքը ներկայացնող պատգամավորներին այսպիսի շինծու հիմնավորումներով զրկում եք պատգամավորությունից, ապա իմացեք, որ մի օր էլ նույնը տեղի կունենա ձեր պատգամավորների հետ»,- ասել է նա: