Մինչև 2022 թվականը իշխանությունն ու ընդդիմություն ձևավորված են. Շարմազանով

Ազգային ժողովի փոխնախագահ Էդուարդ Շարմազանովը կեղծ օրակարգ է որակում ապրիլին ՀՀ-ում կառավարության ձևավորման գործընթացը որպես իշխանափոխության օրակարգ ներկայացնելը:Այս մասին նա հայտարարեց երեկ  ՀՀԿ ԳՄ նիստից հետո լրագրողների հետ հանդիպմանը : «2017թ. ապրիլի 2-ի ընտրությունները  ցույց տվեցին, որ Հայաստանում հետընտրական զարգացման և որևէ դժգոհության կարիք չկա:  Դրա վառ ապացույցն այսօրվա իրավիճակն է: Իսկ այն, որ մի քանի ուժեր կարող են հավաքվել և իրենց դժգոհությունը հայտնել, դա Սահմանադրությամբ նրանց տրված լիազորությունն է, կարող են ցույցեր անել, սակայն դա կեղծ քաղաքական օրակարգ է: Ըստ Սահմանադրության՝Հայաստանի քաղաքացին է  ընտրությունների միջոցով ձևավորում իշխանություն և ընդդիմություն, ինչն էլ Հայաստանի քաղաքացին արել է, իսկ  մեր պարտքն է հարգել Հայաստանի քաղաքացիների կարծիքը: Ապրիլին կառավարության ձևավորումը փորձել ներկայացնել իշխանափոխության կամ նոր իշխանության ձևավորման օրակարգ, կեղծ օրակարգ է, որովհետև ապրիլին կայացած ընտրությունների միջոցով մեր քաղաքացին իշխանությունն արդեն ձևավորել է»,-  նշեց Շարմազանովը: «Ապրիլյան Կառավարության ձևավորումը փորձել ներկայացնել որպես իշխանափոխություն կամ իշխանության նոր ձևավորման օրակարգ՝ կեղծ է: Մինչև 2022 թվականը իշխանությունն ու ընդդիմությունն ընտրություններով ձևավորված են և, կարծում եմ, որ հիմնական ընդդիմադիր խաղացողներն այսօր պառլամենտում են»,-ասաց նա: