Իգնատի Առաքելյանը պատրաստվում է հրաժարակա՞ն տալ

«Իրատես» թերթը գրում է. «Ոչ, նման բան չկա»,- այսպես համառոտ պատասխանելով մեր հարցին, գյուղատնտեսության նախարարի մամուլի խոսնակ Անի Սմբատյանը հերքեց այն խոսակցությունները, ըստ որոնց, նախարար Իգնատի Առաքելյանը պատրաստվում է հրաժարականի դիմում գրելու։ Չնայած սրան, կառավարամերձ աղբյուրի փոխանցմամբ, գյուղատնտեսության նախարարը ցանկացել է դիմում գրել մի քանի ամիս առաջ, սակայն դա չի արել, քանի որ մեծ շուքով աշխատանքից ազատվելու դիմում ներկայացրած էներգետիկայի և բնական պաշարների նախարար Աշոտ Մանուկյանի ուրախ երգը կիսատ է մնացել, և նա ստիպված է եղել դիմումը հետ վերցնել։ Ի դեպ, այս պահին կառավարության միջանցքներում չեն բացառում, որ այս նախարարը երկրորդ անգամ կարող է դիմում գրել։ Փաստենք, որ սա առաջին դեպքն է, երբ իշխանությունը չի պարտադրում, բայց նախարարն ուզում է հեռանալ։ Ըստ որոշ խոսակցությունների, նախարարական պաշտոնից Աշոտ Մանուկյանի հրաժարվելը պայմանավորված է երկու գործոնով. առաջին դեպքում ասում են, թե հաստատված ծրագրերն իրատեսական չի համարում, իսկ երկրորդ դեպքում նշում են, որ նախարարին առաջարկել են միջազգային այլ կազմակերպությունում ավելի հետաքրքիր աշխատանք։ Թե այս երկու գործոններից որն է իրատեսական, դժվար է ասել, սակայն փաստ է, որ էներգետիկայի և բնական պաշարների նախարարի անուն-ազգանունը լրագրողները հաճախ մոռանում են, ինչը բնական է։ Մոտ երկու տարվա ընթացքում լրատվամիջոցների հետ հանդիպել է մեկ-երկու անգամ»: Առավել մանրամասն՝ թերթի այսօրվա համարում