Թիլերսոնն իր պաշտոնազրկման մասին իմացել է թվիթերից (տեսանյութ)

Քաղաքական մեկնաբանները նկատել են, որ պետքարտուղար Թիլերսոնը պաշտոնից հեռացվել է այն բանից հետո, երբ ասել է, որ Ռուսաստանը պատասխանատու է Մեծ Բրիտանիայում ռուս նախկին լրտեսի թունավորման հարցում: «Ռուսաստանը պետք է լուրջ գնահատի, թե որքանով են իրենց գործողությունները բխում ռուս ժողովրդի և ընդհանուր աշխարհի շահերից: Նույն ոճով շարունակելը կհանգեցնի ավելի մեծ մեկուսացմանը, որը ոչ մեկի շահերից չի բխում»,- ասել էր Թիլերսոնը: Նախագահ Թրամփը Թիլերսոնի փոխարեն նշանակել է Կենտրոնական հետախուզական վարչության ղեկավար Մայք Փոմփեոյին: Քաղաքական մեկնաբանների կարծիքով վերջինս լավ տեղեկացված է ընտրություններին Ռուսաստանի միջամտության մասին: «Ուստի հույս ունեմ, որ նա կկարողանա համոզել նախագահին ոչ միայն ընդունելու, որ սա լուրջ խնդիր է, այլ նաև միջոցներ ձեռք առնելու ամերիկյան ժողովրդավարությունը պաշտպանելու համար»,- ասում է Քոնթրիմենը: Պետքարտուղարությունում ձեռնարկված փոփոխությունները տեղի են ունենում մայիսին Հյուսիսային Կորեայի ղեկավարի հետ նախագահ Թրամփի գագաթաժողովից առաջ: Հայտնի է նաև, որ այդ նույն ամսում նախագահ Թրամփը ցանկանում է չեղարկել Իրանի հետ համաձայնագիրը: «Այս երկու գործընթացները չեն կարող միասին դիտարկվել: Հնարավոր չէ, որ գործող համաձայնագրի չեղարկումը որևէ կերպ բարելավի ԱՄՆ-ի դիրքերը Հյուսիսային Կորեայի հետ հարցում: Ընդհակառակը, կարծում եմ, որ դրանից հետո Հյուսիսային Կորեայի առաջնորդը կարող է հարց տալ, թե ինչպես է հնարավոր համաձայնագիր ստորագրել մի նախագահի հետ, ով չեղարկում է բոլոր նախկին համաձայնագրերը»,- ասում է Թոմ Քոնթրիմենը: Սակայն Քոնթրիմենի կարծիքով առանց երաշխիքի գագաթաժողովին մասնակցելու նախագահ Թրամփի պատրաստակամությունը տալիս է Փհենյանի հետ համաձայնության հասնելու հնարավորոթյուն, ինչն արժանի է գովասանքի: Կարծիքներ կան, որ գագաթաժողովի անցկացումն առանց երաշխիքների արդյունավետ չէ: