Շամիրամում 4 անձի սպանության մեջ մեղադրվողի հորեղբայրը դիմել է Վերաքննիչ
Եզդիաբնակ Շամիրամ գյուղում 2017թ. ամռանը սգո սրահում 4 հոգու սպանության մեղադրանքով կալանավորված Թելման Քալաշյանին օժանդակելու մեջ մեղադրվող Քյարամ Քալաշյանը դիմել է Վերաքննիչ դատարան: Քյարամ Քալաշյանը Վերաքննիչ դատարանից պահանջում է վերացնել Արագածոտնի մարզի ընդհանուր իրավասության դատարանի`«Դատական քննության նշանակելու մասին» հունվարի 29-ի որոշումը`պաշտպանի միջնորդությունը մերժելու մասով, այն է`մեղադրյալ Քյարամ Քալաշյանի նկատմամբ որպես խափանման միջոց ընտրված կալանավորումը վերացնել եւ ստորագրություն չհեռանալու մասին խափանման միջոց ընտրել: Կամ Քյարամ Քալաշյանի նկատմամբ գրավի կիրառումը ճանաչել թույլատրելի եւ կիրառել գրավ, սահմանելով գրավի չափը 500.000 ՀՀ դրամ կամ ինչքան, որ դատարանը նպատակահարմար կգտնի: Քյարամ Քալաշյանին մեղադրանք է առաջադրվել այն բանի համար, որ նա պարտակել է առանձնապես ծանր հանցագործությունը` շատերի կյանքի համար վտանգավոր եղանակով, չորս անձանց սպանությունն իրականացրած Թելման Քալաշյանին:
Ըստ մեղադրական եզրակացության՝ Թելման Քալաշյանին մեղադրանք է առաջադրվել այն բանի համար, որ նա 2017թ. օգոստոսի 1-ին Արագածոտնի մարզի Շամիրամ համայնքի գերեզմանատանը կից սգո սրահում, շատերի կյանքի համար վտանգավոր եղանակով կատարել է չորս անձանց սպանություն, բացի այդ, 1999թ. ապօրինի կերպով ձեռք է բերել, պահել հրազեն եւ ռազմամթերք, 2012թ. դեկտեմբերից մինչեւ 2014թ. նոյեմբերն ընկած ժամանակահատվածում կատարել է վաշխառություն` որի հետեւանքով տուժողներն ընկել են նյութական ծանր կացության մեջ, 25.08.2017թ. կատարել է նաեւ սուտ մատնություն:
Թելման Քալաշյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ կետերով, 213-րդ հոդվածի 2-րդ մասի 1-ին կետով, 235-րդ հոդվածի 1-ին մասով եւ 333-րդ հոդվածի 1-ին մասով, իսկ հորեղբորը՝ ՀՀ քրեական օրենսգրքի՝ 334-րդ հոդվածի 1-ին մասով: Նրանց նկատմամբ որպես խափանման միջոց է ընտրվել կալանավորումը:
Հետևեք մեզ Viber-ում
