Նավթի գներն այսուհետ աճելու են

Fiscal Times ինտերնետ պարբերականը թվարկել է ապացույցներն այն բանի, որ նավթի գներն այսուհետ պետք է աճեն։ Պարբերականը գրում է, որ պատմության մեջ շուկայի հագեցվածությամբ պայմանավորված վատագույն ճգնաժամերից մեկը շուտով կավարտվի։ Պարբերականը իր լավատեսությունը հիմնավորում է PRICE Future Group-ի ավագ վերլուծաբան Ֆիլ Ֆլինի եզրահանգումներով, ով կարծում է, որ ԱՄՆ-ում արդյունահանվող նավթի քանակն այս ամռանը կարող է օրական 10 մլն բարելից դառնալ 8 մլն բարել։ Վերլուծաբանը նշում է, որ երբ առաջիկա ամիսներին նավթի գներն աճեն, ամերիկյան ընկերությունները չեն կարող ուղղակի վերադառնալ նավթի հանքավայրեր եւ օգտագործել նոր հանքերը։ Այդ ընկերությունները ստիպված են եղել կրճատել նման ծրագրերի մշակման ծախսերը, մտել պարտքերի տակ, նրանցից շատերը սնանկ կճանաչվեն։ Երկրորդ նախանշանը, որ նավթի գներն աճելու են, այն է, որ ՕՊԵԿ երկրներն ու այլ պետությունները պատրաստ են սառեցնել արդյունահանումը։ Վերլուծաբանը մեջբերում է ՌԴ էներգետիկայի նախարար Ալեքսանդր Նովակի խոսքը, ով հայտնել էր, որ նման քայլի դիմելու պատրաստակամություն են հայտնել այն երկրները, որոնց բաժին է ընկնում աշխարհում նավթի արտադրության 73 տոկոսը։ Երրորդ նախանշանն այն է, որ իրանական նավթը ուժեղ չի ազդի նավթային սեկտորում իրավիճակի զարգացման վրա։ Թեհրանի դեմ պատժամիջոցները չեղարկելու եւ երկրի՝ շուկա վերադառնալու միտքը շատ պետությունների դրդեց ռեկորդային քանակությամբ նավթ արդյունահանել, որպեսզի չկորցնեն իրենց եկամուտը։ Սակայն հիմա, երբ իրանական նավը վերջապես հայտնվել է շուկայում, դա ի հայտ է բերել հետեւյալ խնդիրը. ընկերությունները պատրաստ չեն ներդրումներ կատարել։ «Իրանում նավթի արդյունահանման աճը սպասվածից դանդաղ կընթանա»,- նշում է նա։ Եվ վերջին նախանշանը ձեւավորում է Չինաստանը։ «Աշխարհում խոշորագույն նավթ ներմուծողի տնտեսական աճի տեմպերի դանդաղումը իրականում նավթային սեկտորին այդքան վնաս չի հասցնում, որքան սպասում էին»,- նշում է վերլուծաբանը։ Չինաստանից սպասում էին վառելիքի պահանջարկի նվազում եւ շուկաների փլուզում, սակայն շուկաներում իրավիճակը քիչ թե շատ կայունացել է, եւ նավթի ներմուծումը մնում է ռեկորդային մակարդակի վրա։ Այդուհանդերձ, հավանականությունը, որ Չինաստանում տնտեսական վիճակը ավելի խորը դեպրեսիայի մեջ կհայտնվի, պահպանվում է։