Ցնցող խոստովանություն Բաքվից. Ալիևի բարեկամները «քցում» են նրան

Ամիսներ առաջ Ադրբեջանի նախագահ Իլհամ Ալիևը մի անկեղծ խոստովանություն էր արել: Նա դժգոհել էր, որ փակ դռների ետևում իր վրա ճնշումներ են գործադրում՝ ճանաչելու Լեռնային Ղարաբաղը: Պարզ էր, որ խոսքը կարող էր վերաբերել թե՛ միջնորդներին, թե՛ միջազգային այլ կառույցների ներկայացուցիչներին ու դիվանագետներին: Դա է պատճառը, որ Ալիևը ժամանակ առ ժամանակ «հիստերիկ» նոպաների մեջ է հայտնվում ու բանակցային գործընթացից իր դժգոհությունն արտահայտում է սահմաններում սադրանքներով և բանակցային գործընթացը փակուղի մտցնելով: Նախօրեին խիստ ուշագրավ մեկ այլ հայտարարություն է հնչել Բաքվից... Ադրբեջանի արտաքին գործերի նախարար Էլմար Մամեդյարովը մի հայտարարություն է արել, որը անուղղակիորեն վերաբերում է իսլամական երկրներին ու Լեռնային Ղարաբաղի հարցում այդ երկրների կողմից Ալիևի սպասումներին, որոնք, սակայն այդպես էլ իրականություն չեն դառնում: Ահա, Ադրբեջանի արտգործնախարար Էլմար Մամեդյարովը դժգոհել է, որ «Իսլամական կազմակերպությունում» իրենց մի շարք գործընկեր պետություններ այլ կազմակերպություններում Ադրբեջանին չեն աջակցում: Կարելի է վստահ լինել, որ այդ պետությունների կողմից Ադրբեջանին չաջակցելը հենց Լեռնային Ղարաբաղի հակամարտությանն է վերաբերում: Իսկ սա իր հերթին վկայում է այն մասին, որ Ադրբեջանի արտաքին քաղաքականությունը Լեռնային Ղարաբաղի հարցում ձախողված է, նույնիսկ՝ տապալված է «Իսլամական կազմակերպության» երկրների շրջանակներում: Բացի այդ, այստեղ ուշագրավ է մեկ այլ հանգամանք: Պարբերաբար պաշտոնական Բաքուն հայտարարում էր, թե Հայաստանը իսլամական պետությունների շարքում բարեկամներ չունի: Իհարկե, դա սուտ է: Բայց, ստացվում է, որ պաշտոնական Բաքուն հիմա ինքն է արձանագրում, որ անգամ Ադրբեջանը «Իսլամական կազմակերպության» պետությունների շարքում խնդիրներ ունի ու դժգոհում է գործընկեր այլ անդամ պետությունների պահվածքից: Այն, որ Լեռնային Ղարաբաղի հարցում Ադրբեջանի արտաքին քաղաքականությունը ձախողված է՝ այս մասին բազմիցս է ասվել: Սակայն պաշտոնական Բաքվի կողմից Մամեդյարովի մակարդակով նման արձանագրումը խիստ խոսուն փաստ է այն մասին, որ անգամ իսլամական երկրները գիտակցում են, թե ինչպիսին պետք է լինի Լեռնային Ղարաբաղի ապագան, և այդ ապագան Ադրբեջանի հետ որևէ առնչություն չպետք է ունենա: Թամար Բագրատունի