Ռուսաստանի նախագահի կոմունիստ թեկնածուն սկանդալի կենտրոնում է հայտնվել

Ռուսաստանի նախագահի ընտրություններին մնացել է երկու շաբաթ, և դրանց շուրջ նոր սկանդալ է հասունացել, որի կենտրոնում կոմունիստների թեկնածու Պավել Գրուդինինն է՝ այս ընտրությունների թերևս ամենասկանդալային և իշխանությունների համար ամենաանցանկալի թեկնածուն, ում վարկանիշը, տարբեր տվյալների համաձայն, օրեցօր աճում է։ Երեկ Ռուսաստանի կենտրոնական ընտրական հանձնաժողովի անդամ Ալեքսանդր Կինեևը ասել է, թե Գրուդինինը նախագահի թեկնածու գրանցվելու համար ներկայացրած փաստաթղթերում չի հայտարարել շվեյցարական բանկերում իր 11 հաշիվների մասին, որտեղ դեկտեմբերի 31-ի տվյալներով՝ կար ընդհանուր առմամբ 1 միլիոն դոլարի գումար ու 5․5 կիլոգրամ ոսկի։ Ռուսաստանի օրենքները պահանջում են, որ նախագահի թեկնածուն չունենա արտասահմանյան հաշիվներ։ Պավել Գրուդինինը հայտարարել էր, որ փակել է իր երկու հաշիվները շվեյցարական բանկում։ Իսկ Ռուսաստանի հարկային ծառայությունը պարզել է, որ Գրուդինինը չի հայտարարել ևս 11 հաշվների մասին։ Արդեն երկու օր է՝ ռուսական լրատվամիջոցների հիմնական թեմաներից մեկը Գրուդինինի 1 միլիոն դոլարն ու 5․5 կիլոգրամ ոսկին են։ Կենտրոնական ընտրական հանձնաժողովի մեկ այլ անդամ՝ Նիկոլայ Բուլաևը հայտարարել է, որ հանձնաժողովը մտադիր չէ դիմել Գերագույն դատարան Գրուդինինին ընտրություններից հանելու համար։ Կոմունիստական կուսակցության քարտուղար Սերգեյ Օբուխովը «հիմարություն» է որակել արտասահմանյան հաշիվների մասին տեղեկությունը և ասել է, որ ընտրություններից հետո իշխանությունները կհայտարարեն, թե տեղեկությունը չի հաստատվել, և նման հաշիվներ չկան։ Ինքը՝ Գրուդինինը, շվեյցարական հաշիվների մասին տեղեկությունը սուտ է որակում: «Սա հերթական անհիմն սենսացիան է: Արդեն երրորդ անգամ պատմում են նույն պատմությունը։ Արդեն ծիծաղելի չէ, պարոնա՛յք։ Ես ոչինչ չեմ թաքցրել։ Պարզապես ինչ-որ մեկին անհանգստացնում է ընդդիմադիր գործչի բարձր վարկանիշը»,-«Էխո Մոսկվի» ռադիոկայանի իր բլոգում գրել է նա։ Պավել Գրուդինինին այսօր քարկոծում են ռուսական հեռուստաընկերությունները, իշխանամետ թերթերն ու բլոգերները։ Քաղաքագետ Դմիտրի Օրեշկինը այսպես է բացատրում Գրուդինինի հաջողությունը՝ բարձր վարկանիշը․ «Այսօր ռուսաստանցիների մոտ հստակ կա արդարության պահանջ, և այն մարդիկ, որ ունեն ձախ հայացքներ, այսինքն՝ սոցիալ-դեմոկրատական, որ կարոտում են Սովետական Միությունը, այդ մարդիկ պատրաստ են այսօր իրենց ձայնը տալ ցանկացած նման թեկնածուի, այսինքն՝ Գրուդինինի պես թեկնածուն շուրջ 40 տոկոս ստանալու բոլոր շանսերն ունի»։ Ռուսաստանում թեկնածուների վարկանիշների մասին տվյալներ հրապարակում է միայն Հասարակական կարծիքի ուսումնասիրման համառուսաստանյան կենտրոնը, և այդ կենտրոնի տվյալների համաձայն՝ Գրուդինինը ունի մոտ 8 տոկոս: Իրականում, պնդում են փորձագետները, Գրուդինինի վարկանիշը մի քանի անգամ ավելի բարձր է: Թեև Պավել Գրուդինինը կոմունիստների թեկնածուն է, իրականում նա պարզապես հաջողակ բիզեսմեն է, մեկ այլ հաջողակ բիզնեսմեն՝ Ադրբեջանի նախագահի նախկին խնամի Արազ Աղալարովի բիզնես գործընկերը: Տարբեր տվյալների համաձայն՝ Գրուդինինը Աղալարովին պատկանող՝ Ռուսաստանում ամենամեծ «Վեգաս» առևտրա-ժամանցային կենտրոնի բաժնետոմսերի 10 տոկոսի սեփականատերն է։ Գրուդինինն իրեն համարում է նախևառաջ գյուղատնտես, և պաշտոնապես նա Լենինի անվան սովխոզի տնօրենն է։ Բանն այն է, որ այդ սովխոզը Մոսկվայի անմիջապես հարևանությամբ է, և սովխոզի հաջողության աղբյուրը, տարբեր ուսումնասիրությունների տվյալների համաձայն, ոչ թե ելակն ու կաթն են, այլ շատ թանկ մերձմոսկովյան հողը, որը Գրուդինինը կա՛մ վարձով է տալիս, կա՛մ վաճառում: Ինքը՝ նախագահի թեկնածուն, այս տեղեկությունը, ի դեպ, չի հերքում։ Հավելենք՝ Գրուդինինը հետևել է գործող նախագահ Վլադիմիր Պուտինի օրինակին և նույնպես չի մասնակցում նախընտրական հեռուստաբանավեճերին։ Ռուսաստանի նախագահի ընտրությունները մարտի 18-ին են, թեկնածուները 8-ն են։ Փորձագետների տվյալներով՝ Պուտինը հաղթելու է այս ընտրությունների արդեն առաջին փուլում։ Լիբերալ դաշտը ներկայացնող Գրիգորի Յավլինսկու և Քսենիա Սոբչակի վարկանիշները մեկ տոկոսի սահմաններում են, եթե հավատանք Հասարակական կարծիքի ուսումնասիրման համառուսաստանյան կենտրոնին։ Փորձագետները նաև համոզված են, որ Պավել Գրուդինինի իրական նպատակն է աշնանը հաղթել Մոսկվայի մարզի նահանգապետի ընտրություններին: Ազատություն