ՀԱՊԿ–ն չի օգնի Ղարաբաղին պատերազմի պարագայում. Անատոլի Սիդորով
ՀԱՊԿ արագ արձագանքման 20 հազարանոց զորամիավորումը պատրաստ կլինի ռազմական աջակցություն ցուցաբերել Հայաստանին, եթե նման որոշում կայացնի կազմակերպության բարձրագույն մարմինը՝ խորհուրդը: Այսօր լրագրողների հետ հանդիպմանն այս մասին հայտարարել է ՀԱՊԿ միացյալ շտաբի պետ Անատոլի Սիդորովը: Սակայն ՀԱՊԿ–ն չի օգնի Ղարաբաղին պատերազմի պարագայում, ասել է նա «ՀԱՊԿ անդամ պետությունների ռազմական անվտանգության հիմնական սպառնալիքները» թեմայով Մոսկվա–Երևան–Աստանա–Բիշքեք–Մինսկ տեսակամուրջի ժամանակ: «Լեռնային Ղարաբաղը ՀԱՊԿ անդամ չէ, և կազմակերպությունը Ստեփանակերտին ռազմական օգնություն չի ցուցաբերի։ ՀԱՊԿ համաձայնագիրը ստորագրվել է Հայաստանի հետ, և, համապատասխանաբար, ՀԱՊԿ–ն Երևանի առաջ ունի որոշակի պարտավորություններ։ «Հայաստանի քաղաքացիները պետք է վստահ լինեն, որ սպառնալիքի պարագայում ՀԱՊԿ–ն նրանց վտանգի մեջ չի թողի»,- ասել է նա: Ինչպես տեղեկացրել է՝ համաձայն կազմակերպության կանոնադրության և այլ նորմատիվային-իրավական փաստաթղթերի, կազմակերպության զորքերը նախատեսված են անդամ պետությունների ինքնիշխանության, տարածքային ամբողջականության պաշտպանության համար: Դա տեղի է ունենում տվյալ պետության դիմումի հիման վրա, և որոշումը կայացնում է Հավաքական անվտանգության խորհուրդը: Գեներալ-գնդապետը նշել է նաև, որ Հայաստանի և Ադրբեջանի միջև հարաբերությունները բավականին լարված են, բայց ոչ այնքան, որ երկու երկրները «միմյանցից մայրաքաղաքներ խլեն»:
Հետևեք մեզ Viber-ում
