ՀՀ 4-րդ նախագահ Արմեն Սարգսյանի ընտանիքը/տեսաշար/
Հայաստանի Ազգային ժողովում կազմակերպված քվեարկության արդյունքում ՀՀ 4-րդ նախագահ ընտրվեց Արմեն Սարգսյանը: Այսօր՝ մարտի 2-ին, ԱԺ հաշվիչ հանձնաժողովի նախագահ Գագիկ Մելիքյանը հայտարարեց, որ փակ գաղտնի քվեարկության արդյունքներով Արմեն Սարգսյանը ստացել է 90 կողմ, 10 դեմ ձայն:
Wnews.am-ը ներկայացնում է Արմեն Սարգսյանին եւ նրա ընտանիքը։
Արմեն Սարգսյանը ծնվել է 1953թ. հունիսի 23-ին Երեւանում։
Ավարտել է Երեւանի պետական համալսարանի տեսական ֆիզիկայի եւ մաթեմատիկայի ֆակուլտետը: 1976-1984 թվականները ֆիզիկա է դասավանդել ԵՊՀ-ում, հիմնադրել է տեսական ֆիզիկայի կոմպլեքս համակարգերի համակարգչային մոդելավորման բաժինը:
Դեռեւս Խորհրդային Միության գոյության տարիներին (1984-1985 թթ. եւ 1989-1991 թթ.) եղել է օտարերկրյա հետազոտող եւ դասախոս Քեմբրիջի համալսարանում, Լոնդոնի համալսարանի Մաթեմատիկայի ինստիտուտում:
1992-1995 թթ. Արմեն Սարգսյանը Հայաստանի դեսպանն էր Միացյալ Թագավորությունում: Միաժամանակ զբաղեցնում էր Եվրոպայում Հայաստանի «ավագ դեսպանի», Եվրոպական միությունում, Բելգիայում, Նիդեռլանդներում, Լյուքսեմբուրգում եւ Վատիկանում դեսպանի պաշտոնները:
Նկատենք, որ Արմեն Սարգսյանը մտերիմ է Ուելսի արքայազն Չարլզի հետ։
Արմեն Սարգսյանը 2010-ին նախաձեռնեց «Երեւան, իմ սեր» նախագիծը, որի նպատակը Հայաստանի մայրաքաղաքի պատմական-մշակութային ժառանգության պահպանումն է: Ծրագիրը մեկնարկել էր Վինձորի թագավորական դղյակում տեղի ունեցած աննախադեպ ընդունելությամբ, որը կազմակերպվել էր Բրիտանիայի արքայազն Չարլզի հետ համատեղ եւ որին ներկա էին Հայաստանի նախագահը, Ամենայն Հայոց կաթողիկոսը, հայ եւ այլազգի բարերարներ ու գործարարներ:
Արմեն Սարգսյանն ամուսնացած է, ունի երկու որդի, երեք թոռ:
Նրա կինը՝ Նունե Սարգսյանը, նախկին լրագրող է, այժմ էլ հեքիաթագիր։ Հենց ամուսինն է նրան համոզել հեքիաթներ գրել։
Ամուսինները ծանոթացել են դպրոցում, երբ Նունեն 14 տարեկան էր, իսկ Արմենը՝ 15։ «Նա իմ առաջին ու միակն սերն է»,- Daily Mail-ին տված հարցազրույցում անկեղծացել է Նունե Սարգսյանը։
«Արմենը մեր դպրոցի լավագույն աշակերտն էր, իսկ ես լավագույն դերասանուհին։ Մենք ներկայացնում էինք Շեքսպիր ու Ջորջ Բեռնարդ Շոու անգլերենով, քանի որ անգլերեն սովորելը կոմունիստական կրթության մի մասն էր դեռ այն ժամանակ, ինձ հասնում էր ներկայացման հիմնական հատվածքները։ Սրա պատճառով տղաները վազում էին իմ ետևից, սակայն ես միշտ ասում էի «ոչ»։ Արմենը հետաքրքրվեց ու մտածեց, թե ով է այս աղջիկը, որ մերժում է բոլոր տղաներին»,-պատմել է Նունե Սարգսյանը։
Նունե և Արմեն Սարգսյանները դպրոցական տարիքում մասնակցել են «Երիտասարդ կոմունիստների» կոնֆերանսին, որը շատ ձանձրալի է եղել ու Նունեն Արմենին ու մի քանի այլ աշակերտների հրավիրել է իրենց տուն։ Արմենը տպավորվել է Նունեի հայրիկի գրադարանով, ով լրագրող էր։ Արմենը խնդրել է գիրք վերցնել գրադարանից, ինչը դեմ էր կանոններին, քանի որ հայրը չէր սիրում գրքեր տալ ուրիշներին։
Նունեն վախենալով հոր բարկությունից, որ Արմենը կարող է վերցրած գիրքը չվերադարձնել, դպրոցում գտել է նրան, որպեսզի հետ վերադարձնի գիրքը։
«Ահա այսպես սկսվեց մեր ընկերությունը»,-ասել է Նունեն։
Դպրոցն ավարտելուց հետո նրանք ընդունվել են համալսարան, Արմենը՝ ֆիզիկայի ֆակուլտետ, իսկ Նունեն՝ լեզուների։ Ավարտելուց հետո Արմենին առաջարկվում է պաշտոն Քեմբրիջի համալսարանում։
«Նրան տարբեր համալսարաններից հրավիրել էին 13 անգամ՝ մինչև կոմունիստները թույլ տվեցին»,-ասել է Նունեն։
1984թ․-ին երբ Արմենն արդեն ժամանել էր Մեծ Բրիտանիա, նա և Նունեն արդեն ամուսնացած էին ու ունեին 2 որդի՝ այժմ արդեն 38-ամյա Վարդանն ու 34-ամյա Հայկը։ Նունեն նշել է, որ գիտնականների կանանց չէր թույլատրվում ամուսինների հետ մեկնել արտերկիր։ Մոսկվան թույլ է տվել այցելել ամուսնուն 1985թ․-ին՝ միայն 1 ամսով։
«Ես 30 տարեկան էի, երբ ժամանեցի Լոնդոն։ Դա առաջին անգամ էր, որ ես արտերկրում էի։ Ես սիրահարվեցի Լոնդոնին։ Ես ու Արմենն ասացինք՝ եթե միայն կարողանայինք ապրել այստեղ մեր ողջ կյանքում»,-ասել է Նունեն, քանի որ այդ ժամանակ դա անհնարին էր թվում։
1991թ․-ին կոմունիստական վարչակարգի փլուզումից ու Հայաստանի անկախացումից հետո Հայաստանի առաջին ընտրված նախագահը խնդրել է Արմենին՝ այդ ժամանակ ականավոր ակադեմիկոս, դեսպանատուն բացել Լոնդոնում։ Եվ 1992թ․-ին Նունեն ու տղաները միացել են Արմենին Լոնդոնում։ Մի քանի տարի դեսպան լինելուց հետո՝ 1996թ․-ին, Արմեն Սարգսյանը նշանակվել է Հայաստանի վարչապետ։
2 տարի Նունեն եղել է Լոնդոնում, որտեղ նրանց տղաները սովորում էին դպրոցում, ու Երևանում՝ ամուսնու հետ։
Վարչապետի պաշտոնից հեռանալուց հետո Արմեն Սարգսանը 1998թ․-ին դեսպան է դառնում երկրորդ անգամ։ Այնուհետ Արմեն Սարգսյանը հրաժարվում է պաշտոնից ու կենտրոնանում այլ ծրագրերի վրա։ 2013թ․-ին Արմեն Սարգսյանը դեսպան է նշանակվում արդեն երրորդ անգամ։
Նունեն հպարտությամբ պարբերականին ցույց է տվել թագուհու և Արմեն Սարգսյանի նկարը ու պատմել, որ թագուհին Արմեն Սարգսյանին ասել է․«Արմե՛ն, դու բոլոր դեսպանների չեմպիոնն ես։ Սա արդեն երրորդ անգամ է, որ վերադառնում ես մեզ մոտ»։
Ամուսնու աշխատանքի կողքին Նունեն գտել է իր սեփական ստեղծագործական ուղին։ Նա երեխաների համար հրապարակել է 14 գրքեր։
Նունեն, երբ զբաղված չէ ստեղծագործելով կամ դեսպանի կնոջ պարտականությունները կատարելով, սիրում է լինել իրենց շան ու թոռնիկների հետ, ովքեր Վարդանի ու նրա ամերիկացի կնոջ երեխաներն են։
.jpg)
Արմեն Սարգսյանի որդին՝ Վարդանը, ղեկավարում է իր սեփական կիբերանվտանգության ընկերությունը, Հայկն աշխատում է հոր հետ։
Ի դեպ, նախորդ տարի Սփյուռքի նախարարությունում տեղի ունեցավ Նունե Սարգսյանի հեքիաթների մատենաշարի շնորհանդեսը:
Նրա հեքիաթներից մի քանիսը վերածվել են տիկնիկային բեմադրությունների և հաջողությամբ ցուցադրվում են Թումանյանի անվան տիկնիկային և Խամաճիկների թատրոններում։
Հետևեք մեզ Viber-ում
