Արա Աբրահամյանի իրական դեմքն ու մտավորական թիկնապահները
Վերջերս ռուսաստանաբնակ գործարար Ռուբեն Գրիգորյանը գործարար դաշտում ունեցած վիճաբանության համատեքստում մեղադրանքների տարափ է հղել «Ռուսաստանի հայերի միության», «Համաշխարհային հայկական կոնգրեսի» նախագահ Արա Աբրահամյանին՝ վերջինիս մեղադրելով ռուսաստանաբնակ հայերի ունեցվածքը յուրացնելու մեջ: Վեճն այս այժմ տեղափոխվել է իրավական հարթություն եւ դատարանն ապագայում կվճռի կողմերից որեւէ մեկի արդարացիությունը: Սակայն պարզվում է՝ Հայաստանում մտավորականության մի խումբ որոշել են առաջ ընկնել դեպքերից և հայտարարություն տարածել՝ դատելով ով է արդար, ով մեղավոր: Ավելի կոնկրետ Հայաստանի ստեղծագործական միությունների և ՀՀ ԳԱԱ ներկայացուցիչներ «նկատի ունենալով ՌՀՄ նախագահ Արա Աբրահամյանի հետ երկարամյա բեղմնավոր աշխատանքն ու համագործակցության դրական արդյունքները», չեն կարողացել անտարբեր մնալ իրենց մեկենասի հետ կատարվածի նկատմամբ: «Մեզ` Հայաստանի մշակույթի, գրականության, կրթության և գիտության ոլորտների ներկայացուցիչներիս համար նման երևույթն անընդունելի, նաև դատապարտելի է նախևառաջ նրանով, որ ինչ-ինչ նպատակներով փորձելով վարկաբեկել անհատին, խաթարվում է հայ ժողովրդի դարերով ձեռք բերած բարի համբավն ամբողջ աշխարհում: Մենք դա անհանդուրժելի ենք համարում մանավանդ Արա Աբրահամյանի պարագայում, որի ղեկավարած հաստատությունների, ու նաև անձամբ իր, մարդասիրական, ազգասիրական, հայրենասիրական բաց ու հրապարակային գործունեության արդյունքները հայտնի են բոլորին` Հայրենիքում, Ռուսաստանում և այլուր: Մասնավորապես, մենք կարող ենք վկայել, որ մեր երկրի ու ժողովրդի համար դժվարին, ավելի քան մեկուկես տասնամյակի ընթացքում նա ջանք չի խնայել և, համոզված ենք, այսուհետ ևս չի խնայելու` տարբեր միջոցներով սատարելու է Հայաստանում մշակույթի, գրականության, գիտության և կրթության զարգացմանը, տնտեսական և սոցիալական նախաձեռնությունների խթանմանը, որոնց պարզ թվարկումն անգամ բազմաթիվ էջեր կպահանջեր: Ահա թե ինչու, բնական է թվում հարցը` իսկ ի՞նչ է արել նա, այսպես կոչված «ընդդիմախոսը», իր Հայրենիքի, ազգի, ընդհանրապես մարդկանց համար»: Հայտարարության տակ ստորագրել են Գգրողների միության նախագահ Էդուարդ Միլիտոնյանը, գիտությունների ազգային ակադեմիայի ակադեմիկոս քարտուղար Հրանտ Մաթեւոսյանը, Արամ Սաթյանը՝ Կոմպոզիտորների միության նախագահ, Նկարիչների միության նախագահ Կարեն Աղայանը եւ այլք: Նախ զարմանալի է՝ ինչպես այս մտավորականները պարզեցին, որ գործընթացն այս Արա Աբրահամյանին վարկաբեկելու նպատակ է հետապնդում եւ ոչ թե հենց դա է մերկ ճշմարտությունը: Միթե Արա Աբրահամյանի արժանիքների մասին պետք է դատել այն գումարի չափից, որը նա տալիս է ստեղծագործական այդ միություններին որպես օգնություն, թե նրա գործով: Իսկ Աբրահամյանի վերջին տարիների ողջ գործունեությունը մեր աչքի առջեւ է: Նա ծառայում է հանուն ռուսաց թագավորի ու պատեհ-անպատեհ առիթներով փառաբանում Վլադիմիր Վլադիմիրովիչին՝ դա անելով Հայաստանի ու հայ ժողովրդի սուվերենությունն ոտնակոխ անելու հաշվին: Իսկ ինչ է արել Արա Աբրահամյանը Ռուսաստանում հայապահպանման ու հայկական ինքնությունը չկորցնելու համար, եթե նա մեկ անգամ չէ, որ ցույց է տվել՝ հայրենիքի շահը ստորադասում է Ռուսաստանի շահին, երբեւէ չի պայքարել հայ համայնքի ոտնահարված իրավունքների ու շահերի համար, թթու խոսք չի ասել ռուսական իշխանություններին, հարկ եղած դեպքում անարգել է իր ժողովրդին, նա լռել է անգամ, երբ Պուտինը ծաղրել ու հռհռալով հեգնել է՝ թե Հայաստանում ինչպես Արա Աբրահամյանն է ասում, ոչ թե 3 միլիոն հայ կա, այլ շատ-շատ ավելի քիչ: Չտեսնել այս պարոնի իրական դեմքն ու էությունը եւ սեփական խեղճությունից ու հերոսներ կերտել, ուղղակի ողբերգություն է: Անի Սահակյան
Հետևեք մեզ Viber-ում
