Ով է «պառակտում» Ելք դաշինքը
Ընդդիմադիր «Ելք» դաշինքում խժդժությունները չեն դադարում։ Սերժ Սարգսյանի վարչապետության դեմ պայքարի հարցում դաշինքի մաս կազմող երեք ուժերը տեղեկությունների համաձայն միակարծիք չեն։ Արդեն մի քանի օր է մամուլում լուրեր են սպրդվում, որ Նիկոլ Փաշինյանը Քաղաքացիական պայմանագրով ավելի ռադիկալ մոտեցումներ ունի եւ ցանկանում է շուրջօրյա հանրահավաքներ սկսել։ Նա օրերս Ֆեյսբուքի իր էջում էլ գրառեց, որ ընտանիքի հետ քննարկել են հարցը եւ ընտանիքը համաձայն է իրեն գործուղել Ազատության հրապարակ։ Սրանից հետո ավելի ինտենսիվ դարձան Ելք-ում տարաձայնությունների մասին լուրերը, իսկ մամուլը այսօր գրեց, որ Էդմոն Մարուքյանը հնարավոր է հեռանա։ Ելք դաշինքի մաս կազմող Հանրապետություն կուսակցության ղեկավար Արամ Սարգսյանը , սակայն, այսօր լրագրողներին վստահեցրեց, որ «Ելք»-ում միասնական եւ հստակ տեսակետ կա Սերժ Սարգսյանի՝ վարչապետ դառնալու հարցի վերաբերյալ: «Թե իմ, թե Նիկոլ Փաշինյանի, թե Էդմոն Մարուքյանի, թե Սերժ Սարգսյանի միջեւ կոնսենսուս կա, որքան էլ դա զարմանալի լինի։ Որովհետեւ մենք երեքս էլ համարում ենք, որ 3-րդ ժամկետ պաշտոնավարելը ճիշտ չէ: Այստեղ բացառիկ տեսակետների համընկնում է, ինչը շատ ողջունելի է»: Եւ եթե հանրությունը «ռեալ պահանջարկ» դնի, իրենք իրենց պատվի խնդիրը կհամարեն այդ պահանջարկն իրականացնելը: Սարգսյանը տեղեկացրեց, որ դաշինքում քննարկում են «ճանապարհային քարտեզը», որի շուրջ նրա խոսքով կոնսենսուս դեռ չկա, բայց կլինի:Հետաքրքիր է՝ ինչու է Նիկոլ Փաշինյանը գործուղվում Ազատության հրապարակ, եթե դաշինքում դեռեւս վերջնական որոշում չկա ․ «Նիկոլ Փաշինյանը քաղաքական գործիչ է, քաղաքական ուժի անդամ է, վառ անհատականություն, ով հայտնի է եղել իր անհատական մոտեցումներով, ինքն իրավունք ունի իր ընտանիքի հետ քննարկել խնդիրներ, այդ մասին գրել: Եթե Նիկոլ Փաշինյանը դեմ լիներ քննարկմանը, ապա քննարկում չէր լինի դաշինքում: Ինքը քննարկել է իր ընտանիքում, նրանք դեմ չեն, որ իրենց հայրն, ամուսինն իր բողոքը ծավալի նաեւ Ազատության հրապարակում: Նիկոլ Փաշինյանի հայտարարության մեջ ոչ մի վատ բան չեմ տեսնում: Մտահոգ հայ մարդու տեսակետ եմ տեսնում: Այդ մարդը մի անգամ այդ գործընթացներին գնալով, դատվելով, զրկանքներ կրելով, նորից պատրաստ է զրկանքներ կրելու: Ասում է՝ ժողովուրդ ջան, եթե դու պատրաստ ես, ես էլ եմ պատրաստ»: Սակայն «Ելք»-ը հայտարարել էր, որ հանրությանը հիասթափության ու պարտության չի տանելու, չունենալով հստակ քայլեր, ինչու է Փաշինյանը գործուղվում հրապարակ, Արամ Սարգսյանը պատասխանեց. «Իսկ ո՞վ է ասում, որ մենք այսօր չենք քննարկում ճանապարհային քարտեզ, որ մենք առանց դրա Նիկոլ Փաշինյանին գործուղում ենք Ազատության հրապարակ»: Գրեթե նույնը կրկնեց դաշինքի ղեկավար Լուսավոր Հայաստան կուսակցության ղեկավար Էդմոն Մարուքյանը։ Նա նշեց, որ օրակարգային հարցեր կան, հիմա դրանք են քննարկվում: Երբ որ կլինի որոշում, կհրապարակեն: Իսկ ինչ վերաբերում է առկա կոնսենսուսին, դա այն է, որ Ելք դաշինքի համար Սերժ Սարգսյանի պաշտոնավարման երրորդ ժամկետն անընդունելի է: «Իսկ պայքարի այլ մեթոդների մասով քննարկումների մեջ ենք, երբ որ կլինի որոշում, կտեղեկացնենք: Ես չեմ կարող քննարկման մանրամասները դուրս հանել: Հիմնական մտահոգությունն այն մասին է, թե ինչպես անել, որ դաշինքն ունենա պայքարի արդյունավետ պայքարի միջոց»,- ասաց նա: Հարցին, թե ինչպե՞ս է վերաբերում Նիկոլ Փաշինյանի ընտանիքի որոշմանը, ըստ որի՝ Փաշինյանը «գործուղվել է» Ազատության հրապարակ, Մարուքյանը պատասխանեց, որ այդ հարցը չեն քննարկել, իսկ Փաշինյանն արդեն տվել է այդ հարցի պատասխանը: Ստացվում է, որ Ելք-ում առնվազն երկուսը նույն տեսակետն են հայտնում, իսկ մեկը՝ Նիկոլ Փաշինյանը առաջ է ընկել զարգացումներից եւ տեղի տվել պառակտությունների մասին խոսակցություններին։ Եթե դաշինք է, առնվազն նա պետք է հարգի կողմերի որոշումը, իսկ այս դեպքում կողմերը վստահեցնում են, որ վերջնական որոշում չունեն, գուցե Նիկոլ Փաշինյանին հայտնի է նրանց դիքորոշումը, սակայն դրա մասին նա առնվազն պարտավոր է հայտարարել, ասելով, որ ինքը չունենալով գործընկերների աջակցությունը դուրս է գալիս դաշինքից։ Իսկ այս պարագայում ստացվում է, որ նա ընդամենը արմատական ընդդիմադիրի դիվիդենտներ շահելու խնդիր է լուծում։ Անի Սահակյան
Հետևեք մեզ Viber-ում
