Էրդողանին բարդ ժամանակներ են սպասվում
Անկարան այլևս չի հավակնում մերձավորարևելյան գերտերության կարգավիճակին Թուրքիայի դիրքերի թուլացումից հետո, որի պատճառը վերջինիս կողմից խոցված ռուսական ինքնաթիռն է: Այս մասին Al-Monitor-ում գրում է լրագրող, Մերձավոր Արևելքի հարցերով փորձագետ Չենգիզ Կանդարը: Եթե որոշակի կասկածներ կային, ապա Թուրքիայի իշխող կուսակցության վերջին հուսահատ ջանքերը՝ խուսափել երկրի միջազգային մեկուսացումից, պետք է ցրեին դրանք. Անկարան չմտածված որոշում կայացրեց և միացավ ընդդեմ ահաբեկչության Սաուդյան Արաբիայի կոալիցիային: Դաշինքը, որից հրաժարվեցին այնպիսի երկրներ, ինչպիսիք են Պակիստանը և Մալայզիան, շատ վերլուծաբանների կարծիքով, սունիական կոալիցիա է, որի ուժերով Էր-Ռիադը մտադիր է թուլացնել Իրանի ազդեցությունը տարածաշրջանում: Համաձայնելով մի շարքում կանգնել Կոմորյան կղզիների, Մալիի և Նիգերիայի հետ կոալիցիայում, որը ղեկավարում է Սաուդյան Արաբիան, Թուրքիան կորցրեց սունիական պետության կարգավիճակին հավակնելու իր իրավունքը՝ ի հակակշիռ Իրանի: Տարածաշրջանային գերտերության հավակնությունից հրաժարվելու ևս մի ապացույց է Թուրքիայի և Իսրայելի հարաբերությունների սերտացումը: Հունվարի սկզբին Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան և Իսրայելը պետք են միմյանց: Կանդարի կարծիքով՝ թուրք առաջնորդն այս կերպ գնահատեց փոփոխվող աշխարհաքաղաքական իրավիճակը տարածաշրջանում և հասկանալ տվեց, որ Անկարան այլևս չի ձգտում վիճարկել Իսրայելի տարածաշրջանային դերը: Թուրքիան, աջակցելով սաուդցիների սունիական կոալիցիային և Իսրայելին, որը տարածաշրջանում ամենահակաիրանական երկիրն է, ոչ միայն հրաժարվում է տարածաշրջանային գերտերությունից, այլ նաև հանդես է գալիս Իրանի դեմ այնպես, ինչպես երբեք՝ ընդգծում է վերլուծաբանը: Կարծիք կա, որ Անկարայի ձեռնարկած քայլերը Սաուդյան Արաբիայի և Իսրայելի նկատմամբ դրական գնահատական են ստացել Վաշինգտոնի կողմից: Սակայն ԱՄՆ-ի շտաբների հրամանատարի միացյալ կոմիտեի նախագահ Ջոզեֆ Դանֆորդի այցը Թուրքիա բացահայտեց երկու երկրների միջև անհանգստության հիմնական աղբյուրը՝ Վաշինգտոնի աջակցությունը սիրիացի քրդերին: Խոսքը քրդական կազմակերպությունների ինքնապաշտպանական ուժերի մասին է, որ Սիրիայում կռվում են ԴԱԻՇ-ի դեմ: Անկարան մտավախություն ունի, որ նրանց ուժերով կստեղծվի քրդական միջանցք երկրի հյուսիսում, ինչը Թուրքիայի շահերից չի բխում: Կանդարը մեջբերում է Սիրիայի հարցով ամերիկացի փորձագետ Ջոշուա Լենդիսին, որը հայտարարել է. եթե հաշվի առնենք, որ քրդական ջոկատները օգնում են պայքարել ԴԱԻՇ-ի դեմ, իսկ Էրդողանը՝ ոչ, ապա Վաշինգտոնի և Քրդստանի աշխատավորական կուսակցության միջև համագործակցությունը կխորանա: Այսպիսով Թուրքիային և երկրի առաջնորդ Էրդողանին, որը կորցնում է դիրքերը միջազգային բեմահարթակում, սպասում են դժվար ժամանակներ՝ ամփոփում է Կանդարը:
Հետևեք մեզ Viber-ում
