Դուք ռեկորդակիր եք. ձեր պաշտոնավարման օրոք պատմության մեջ աննախադեպ թվով քաղբանտարկյալներ են եղել

«Ես իմացա, որ Ձեզ առաջադրել է ՀՅԴ-ն: Դաշնակցության էն անդամներն, ովքեր 90-ականների կեսերին եղել են բանտերում, նրանք քաղբանտարկյա՞լ են եղել, թե՞ քրեական հանցագործ: Պարոն Ռուստամյանն էլ կակռազ մտավ»,- դիմելով ՀՀ արդարադատության նախկին նախարար, Բարձրագույն խորհրդի անդամի պաշտոնում առաջադրված Գևորգ Դանիելյանին` հարցրեց Նիկոլ Փաշինյանը: Ի պատասխան Գևորգ Դանիելյանն ընդգծեց. «Դուք շատ լավ գիտեք, որ անգամ ձեր առնչությամբ, երբ եղել է որևէ ահազանգ, ինձ համար երբևէ արգելքներ չեն ստեղծվել: Իմ հեռախոսահամարը միշտ զատ է եղել, մշտապես արձագանքել եմ: Դուք չեք կարող պնդել, որ այդ արձագանքը եղել է ոչ համարժեք: Ինքս եմ անձամբ այցելել ՔԿՀ-են, փորձել եմ հասկանալ ինչպիսին է վիճակը»: Սակայն անապատասխան թողեց Արմեն Ռուստամյանին վերաբերող հարցը և նշեց. «Ակնկալում էի, որ այն մարմնի թեկնածուին, որը պարտավորվել է ապաքաղաքականացված լինել, պետք է ավելի շատ իրավական բնույթի հարցեր հնչեին, բայց երևի ձեր դիրքորոշումն այն է, քանի որ դեռևս չեմ ստանձնել այդ պաշտոնը, կարելի է քաղաքական հարցեր տալ։ Ես արդեն հայտնեցի իմ կարծիքը, ավելացնելու ոչինչ չունեմ: եթե որևէ մարդ ունեցել է քաղաքական բնույթի գործունեություն ու դատապարտվել ցանկացած արարքի համար, պետք է որակենք քաղաքական, հետապնդումը քաղաքական, բայց դրանք տարբեր երևույթներ են»,- ասաց Դանիելյանը: