Մայրը նորածնին ցանկացել է մանկատուն հանձնել՝ հետագայում, սակայն, երեխայի խնամքն ստանձնած ամուսիններից սկսել է գումարներ շորթել
Արմավիրի մարզում բնակվող կինը ծննդաբերելուց օրեր անց որոշել էր երեխային մանկատուն հանձնել: Երեխային մանկատուն հանձնելու պատճառն էլ, իբրև թե, հանդիսացել են սոցիալական ծանր պայմանները և երեխայի խնամքով զբաղվելու հնարավորություն չունենալը: Կինը երեխային լույս աշխարհ է բերել 2017թ. մարտի 30-ին և շուրջ մեկ շաբաթ անց երեխային հանձնել Էջմիածնում բնակվող ամուսիններին, ովքեր տեղեկանալով այն մասին, որ կինը ցանկանում է երեխային հանձնել մանկատուն՝ խնդրել են երեխայի խնամքն իրենց վստահել:
Երեխային կենսաբանական մայրը՝ Գյուլլիզարը, Գայ գյուղում 2017թ. ապրիլի 6-ին հանդիպել է ամուսիններին, նորածնին հանձնել նրանց՝ պարտավորվելով երեխայի ծննդյան կապակցությամբ վճարվող պետական նպաստի գումարն ստանալու դեպքում նրանց տրամադրել նաև երեխայի ծննդյան վկայականը` որդեգրման կամ խնամակալության հարցը լուծելու նպատակով: Սակայն որոշ ժամանակ անց Գյուլլիզարը կապ է հաստատել երեխայի խնամքն ստանձնած ամուսինների հետ և նրանցից պահանջել գումար` նպաստը ստանալու նպատակով համապատասխան փաստաթղթերի ձեռք բերման ընթացիկ ծախսերը հոգալու համար: Տղամարդը նրան տվել է 20.000ՀՀ դրամ, սակայն 2017թ. սեպտեմբերի 22-ին Գյուլլիզարը կրկին զանգահարել է տղամարդուն և հայտնել, որ գումարը ծախսել է, սակայն չի կարողացել ձեռք բերել փաստաթղթերը և կրկին գումար է պահանջել: Երեխայի խնամքն ստանձնած տղամարդը մերժել է, ինչից հետո էլ զանգահարել է ոստիկանության՝ հայտնելով կատարվածի մասին: Այս ամենի մասին տեղեկանալով՝ Գյուլլիզարը զայրացել է, և ինքը ևս գնացել է ոստիկանություն, որտեղ էլ ստել է՝ ասելով, թե իր երեխային իբրև 2016թ. ապրիլի 3-ին ժամը 17-ից 18-ի սահմաններում «Հանրապետական» ծննդատան մոտակայքից պատահական տաքսի ավտոմեքենայի միջից գողացել են և տարել անհայտ ուղղությամբ: Քննությամբ պարզվել է, որ Գյուլլիզարը սուտ մատնություն է կատարել, և նրան մեղադրանք է առաջադրվել՝ ՀՀ քրեական օրենսգրքի 333-րդ հոդվածի 1-ին մասով: Քրեական գործով նախաքննությունն ավարտվել է, և գործը գտնվում է դատավոր Վահե Խալաթյանի վարույթում: Աղբյուր` Փաստինֆո
Հետևեք մեզ Viber-ում
