«Ինչու՞ եք թուրքին այստեղ նստեցրել». Պավել Մանուկյանը՝ դատախազին
«Սասնա ծռեր» խմբի 10 ադամի գործով այսօրվա դատական նիստին դատարանի որոշմամբ ներկայացել էին հանրային պաշտպաններ, որոնք լիազորված էին իրականացնել «Սասնա ծռեր» խմբի անդամներից շատերի շահերը: Ամբաստանյալները, հիշեցնենք դեմ են հանրային պաշտպանների ներկայությանը:Նրանք պնդում են,որ իրենք ունեն իրենց կողմից ընտրված պաշտպաններ: Հանրային պաշտպանները հայտարարեցին, որ թեեւ իրենք ներգրավվել են որպես ամբաստանյալների շահերի պաշտպան, սակայն նրանց կողմից ընտրված պաշտպանները ներկա են նիստերի դահլիճում եւ առաջարկեցին դատարանին անդրադառնալ այս հարցի լուծմանը: Հանրային պաշտպան ներգրավելու վերաբերյալ իրենց դիրքորոշումը հայտնելիս Արայիկ Խանդոյանն ասաց, որ ինքը ոչ թե պաշտպաններ, այլ եղբայրներ ունի՝ ի դեմս հետևյալ անձանց. «Ես պաշտպան ունեմ,փառք Աստծու,Արայիկներս,Մուշեղս,մենք մերոնցով էլի։Եթե ձեզ համար պարտադիր պայման է, որ հանրային պաշտպան ունենանք, ապա, ներեցեք,բայց մեզ պարտադիր մի հատ աղջիկ է պետք ձեր լավերից»։ Դատարանը Խանդոյանին միջամտեց։ Դատախազ Պետրոս Պետրոսյանը փորձում էր դիրքորոշում հայտնել, նրան ընդհատեց Պավել Մանուկյանը: «Ես ձեր դիրքորոշման, ձեր հայտարարության վրա թքած ունեմ»,- հայտարարեց Պավել Մանուկյանը: Դատարանը նախազգուշացրեց Պավել Մանուկյանին, որ շարունակվելու դեպքում Մանուկյանին կհեռացնի, ինչին Մանուկյանը հակադարձեց, որ կարող է հեռացնել. «Ես թքած ունեմ ձեր որոշումների վրա»,- հազիվ լսելի էր Մանուկյանի ձայնը: Հանրային պաշտպան ներգրավելու վերաբերյալ իր դիրքորոշումը հայտնելիս Վարուժան Ավետիսյանն ասաց, որ բոլորը ռեժիմի գործիքներն են.«Հետևաբար դուք ձեր արածն արե՛ք, մենք էլ մեր անելիքի կեսն արել ենք, կեսն էլ կանենք այն ժամանակ, երբ ժողովուրդը ոտքի կանգնի»։ Ամբաստանյալ Արմեն Բիլյանն էլ իր հերթին ասաց. «Եթե երկրի նախագահը ադրբեջանցուն հրապարակային ասում է՝ դու իմ հայրենակիցն ես, դուք էլ այդ նույն նախագահի կողմից նշանակվածն եք, ես ձեզ ի՞նչ ասեմ»։ Մանուկյանը դիմելով դատավորին՝ ասաց.«Խի՞ ես էս թուրքին բերել նստացրել դեմս»: Մեղադրողը, սակայն սա անարձագանք չթողեց. «Թուրք դու ես»: Նորից ինչ-որ բան հնչեց, որից հետո մեղադրող դատախազը հունից դուրս եկավ. «Արա՛, հանգստացի հլը»: Դատավորը սանկցիա կիրառեց Արայիկ Խանդոյանի, Սմբատ Բարսեղյանի եւ Պավել Մանուկյանի նկատմամբ եւ նրանց հեռացրեց նիստերի դահլիճից: «Սասնա ծռեր» խմբի անդամները պահանջում էին նիստերի դահլիճից հեռացնել նաեւ մեղադրող դատախազին: Դատավորը մեղադրող դատախազ Պետրոս Պետրոսյանի նկատմամբ նախազգուշական սանկցիա կիրառեց:
Հետևեք մեզ Viber-ում
