«Արմենիա» բժշկական կենտրոնի ծննդատանը պահանջում են գումարով շնորհակալություն հայտնել (լուսանկարներ)
Սյունիքի մարզի Սիսիան քաղաքի բնակչուհի, 37-ամյա Հերմինե Առուստամյանը փետրվարի 13-ին Արմենիա բժշկական կենտրոնի ծննդատանը լույս աշխարհ է բերել իր 8-րդ երեխային:
Վերջինիս տեղափոխել են Երևան, քանի որ ծննդաբերությունը եղել է բարձր ռիսկային և արու զավակը ծնվել է կեսարյան հատումով:
Հերմինեի մեծ երեխան էլ այժմ ծառայում է հայոց բանակում:
SHAMSHYAN.com-ին զանգահարած ծննդկանը իր վրդովմունքը հայտնեց բժիշկների վերաբերմունքից: Նա ասաց, որ երբ ծննդաբերությունից հետո մտել է տնօրեն Ռազմիկ Աբրահամյանի մոտ՝ իր շնորհակալությունը հայտնելու, վերջինս ասել է, որ դատարկ ձեռքով շնորհակալություն չեն հայտնում, պետք է և՛ իրենց լավություն անի, և՛ կեսարյան անող բժշկին, և՛ քույրերին:
Բազմազավակ մայրը հավելեց, որ իրենք հնարավորություն չունեն այդ գումարները վճարելու, նամանավանդ, որ դրանք չհիմնավորված են:
Նա խնդրեց Առողջապահության նախարարության աշխատակիցների ուշադրությունը՝ ծննդատանը անօրինական գումարներ պահանջելու փաստով:
Հետևեք մեզ Viber-ում
