«Դե չեն ուտում մեր քաղաքացիները BMW-ի ֆառ, հիմա ինչ անենք». Նաիրա Զոհրաբյան

Ազգային ժողովում ընթանում է ԵԼՔ խմբակցության նախաձեռնած արտահերթ նիստը՝ «Հարկային օրենսգրքում փոփոխություններ եւ լրացումներ կատարելու մասին» օրենքի նախագծի վերաբերյալ: Ծառուկյան խմբակցության պատգամավոր Նաիրա Զոհրաբյանը մտքերի փոխանակության ժամանակ նշեց, որ գնաճը 2.6 տոկոսից շատ ավելի բարձր է. «Մենք պետք է մի բան մեր մտքում պահենք, որ առնվազն առաջիկա երկու տարում թոշակ ու նվազագույն աշխատավարձ չի բարձրանա: Կառավարության ղեկավարն օրեր առաջ այս ամբիոնից շատ հպարտ հայտարարեց, որ շատ նվազ է մեր գնաճը, ունենք 2.6 տոկոս գնաճ: Ես կարծում եմ, որ մեր վիճակագրական ծառայությունը կամ այն կազմակերպությունները, ովքեր ապատեղեկատվություն են ներկայացնում կառավարության ղեկավարին, պիտի ենթարկվեն պատասխանատվության: Այո, եթե 2.6 տոկոս գնաճ ենք ներկայացնում, պիտի տեսնենք, թե ինչն ենք հաշվում և ինչպես ենք հաշվում: Ասացին, որ BMW-ի ֆառերի գինն էժանացել է: Նայում եմ առաջին անհրաժեշտության սպառողական կենսաապահովման զամբյուղը: Նայում եմ՝ հաց, կաթ, կարտոֆիլ. BMW-ի ֆառ առաջին անհրաժեշտության զամբյուղում չկա: Դե չեն ուտում մեր քաղաքացիները BMW-ի ֆառ, հիմա ինչ անենք»,- ասաց Նաիրա Զոհրաբյանը: Այնուհետև տեղեկացրեց, որ ՄԱԿ-ի պարենի կազմակերպության գներով կտրուկ գնանկում է տեղի ունեցել մի շարք սննդամթերքների մասով՝ կաթ, միս, շաքարավազ: «Էդ ո՞նց է լինում, որ միջազգային շուկայում գնանկում է, մեզ մոտ գնաճ է տեղի ունենում: Ես խնդրում եմ այստեղ հրավիրեիք այդ ոլորտի, նաև բենզինի և դիզվառելիքի ոլորտի տիրակալներին, որպեսզի իրենք բացատրեին, թե ոնց է լինում, որ Ռուսաստանում բենզինի ու դիզվառելիքի գինն ընդամենը 8 տոկոսով է աճել, իսկ Հայաստանում՝ 30»,- ասաց նա: