Ելքը վարչապետի թեկնածու կունենա

Այսօր Ազգային ժողովում ուսանողների հետ հանդիպման ժամանակ ԱԺ ԵԼՔ խմբակցության պատգամավոր Նիկոլ Փաշինյանը պատասխանել է ուսանողների մի շարք հարցերի՝ այդ թվում նախագահի եւ վարչապետի վերաբերյալ: Նիկոլ  Փաշինյանը տեղեկացրել է, որ իրենք որոշել են մասնակցել ընտրություններին: «Առջեւում երկու ընտրություն կա՝ նախագահի եւ վարչապետի: Մենք ամեն դեպքում մասնակցելու ենք ընտրություններին եւ դեմ ենք քվեարկելու: Մենք որոշել էինք մեր խմբակցության անդամ Արտակ Զեյնալյանին առաջադրել նախագահի թեկնածու, բայց չհաջողվեց, որովհետեւ դրա համար անհրաժեշտ էր պատգամավորների առնվազն մեկ քառորդի ստորագրությունը, իսկ ստորագրությունները բավարար չեղան: Այլ հարց է վարչապետի ընտրությունը, քանի որ հիմա ակնհայտ է որ հանրապետականի թեկնածուն Սերժ Սարգսյանն է լինելու, որը հայտարարել էր, որ ինքը չի հավակնելու վարչապետի պաշտոնին, եւ դա արել է պաշտոնապես, տեսախցիկների առաջ, եւ դա արել է որպես սահմանադրական փոփոխությունների հիմնավորում, սա ես կարծում եմ, որ ամեն քաղաքացի եւ ամեն քաղաքական ուժ պետք է իր դիրքորոշումը հստակեցնի այս իրավիճակի վերաբերյալ: ԵԼՔ խմբակցության դիրքորոշումը հստակ է՝ մեզ համար անընդունելի է Սերժ Սարգսյանի թեկնածությունը հենց այդ պատճառով եւ ԵԱՏՄ քաղաքական ավանդույթների ներմուծման ու արմատավորման պատճառով»,- ասաց ԵԼՔ խմբակցության ղեկավարը: