Ո՞ր դեպքում Պուտինը կզիջի
Բաքու էր մեկնել Ռուսաստանի փոխվարչապետ Դմիտրի Ռոգոզինը՝ Ադրբեջանի նախագահ Իլհամ Ալիևի հետ քննարկելու` Ռուսաստանի ու Ադրբեջանի ռազմատեխնիկական համագործակցության կարգավորման հարցը: Այս անսպասելի լուրը հայտնեց ռուսաստանյան «Коммерсантъ» պարբերականը։ Պարզվում է, «Ռոսօբորոնէքսպորտ»-ի, Ռազմատեխնիկական համագործակցության հարցերով դաշնային ծառայության ներկայացուցիչների և ՌԴ փոխվարչապետ Դմիտրի Ռոգոզինի այցը Բաքու «հատուկ բնույթ» է կրում և նախապես չի պլանավորվել: Պարբերականը հայտնեց, որ ռազմական ոլորտում Ռուսաստանի և Ադրբեջանի հիմնական խնդիրները կապված են սպառազինության վերաբերյալ պայմանագրերի իրականացման հետ, որոնք կնքվել են դեռևս մի քանի տարի առաջ: Հիմնական բարդությունն Ադրբեջանի գումարի բացակայությունն է՝ պարտքերը մարելու համար։ Աղբյուրները հայտնում են, որ նավթի գների անկումն ազդել է Ադրբեջանի տնտեսական վիճակի վրա: Ընդ որում, ռուսական լրատվամիջոցը նշում է, որ Ադրբեջանի խնդիրները մատակարարումների վճարման հետ կարող են ինչպես օբյեկտիվ, այնպես էլ առևտրային դիրքորոշում լինել Ռուսաստանի հետ բանակցություններում: Չի բացառվում նաև, որ ադրբեջանցի բանակցողները կբարձրացնեն Հայաստանին ռուսական սպառազինության մատակարարման հարցը, քանի որ ավելի վաղ Մոսկվան Երևանին մոտ 200 մլն դոլարի վարկ է տրամադրել։ Այսպես` «հատուկ բնույթ» և նախապես չպլանավորված այս այցը ինչո՞վ կավարտվի, թերևս մանրամասներն առաջիկայում հայտնի կդառնան: Սակայն ամենագլխավոր հարցը, որը ծագում է, այն է, թե ինչի՞ դիմաց Մոսկվան կարող է զիջել Ալիևին, որը ֆինանսական խնդիրների առջև է կանգնել: Թե ինչ դիրքորոշում ունի Ադրբեջանը Ղարաբաղի հարցում, դա հայտնի է բոլորին: Որ Ալիևը Պուտինից կարող է պահանջել Ղարաբաղի հարցում ադրբեջանանպաստ լուծում, դա էլ է պարզ: Իսկ որ պաշտոնական Բաքուն արդեն Հայաստանին զենք մատակարարելու հարցում է դժգոհություն հայտնում, դա էլ օրեր առաջ տեղի ունեցավ. Ադրբեջանը բողոքի նոտա հղեց Ռուսաստանին՝ Հայաստանին 200 միլիոն դոլարի զենք վաճառելու մտադրության համար։ Ինչո՞ւ է Կրեմլը Բաքու «բանագնաց» ուղարկել, քիչ անց ավելի հստակ պատկերացումներ հնարավոր կլինի կազմել: Առայժմ մնում է հուսալ, որ Մոսկվայից Բաքու ժամանած «բանագնացի» այցի արդյունքում ոչ հայանպաստ ինչ-որ գործարքներ չեն կնքվի: Առաջիկա օրերին Ադրբեջանից հնչող հայտարարությունների տոնայնությունից էլ հնարավոր կլինի հասկանալ, թե Ռոգոզինի այցի ընթացքում ձեռքբերված պայմանավորվածություններն ինչպիսին են եղել: Թամար Բագրատունի