Վահրամ Բաղդասարյանը գիտի,թե ում են առաջադրելու վարչապետ
Արմեն Աշոտյանն «Ազատության» եթերում հայտարարել էր, որ պատրաստ է վարչապետի պաշտոնում առաջադրել Սերժ Սարգսյանի թեկնածությունը՝ նշելով, որ շատերն են կիսում իր տեսակետը: ԱԺ այսօրվա ճեպազրույցների ժամին լրագրողները ՀՀԿ խմբակցության ղեկավար Վահրամ Բաղդասարյանից հետաքրքրվեցին՝ սա, ըստ էության, խնդրանք պետք է լինի՞ ՀՀԿ-ի կողմից, որ Ս. Սարգսյանը դառնա վարչապետ. «Խնդրանքներով կամ հավակնություններով վարչապետ չեն լինում, կա այդ տրամադրվածությունը, դուք ճիշտ եք նկատել, իհարկե, մենք դեռ չենք քննարկել, երբ որ քննարկում կազմակերպենք, յուրաքանչյուր անդամ կհայտնի իր տեսակետը, այո՛, կա ցանկություն, սակայն յուրաքանչյուրը կհայտնի իր ցանկությունը:Մի շտապեք, քանի որ նախ մարտի 2-ին ընտրելու են ՀՀ նախագահ, որից հետո նոր այդ հարցի շուրջ քննարկումներ կկազմակերպեն »,- ասաց Բաղդասարյանը: Ճշտող հարցին, թե բացի Սերժ Սարգսյանից, այլ անձի հետ կապված կա՞ ցանկություն, Բաղդասարյանն ասաց, թե որեւէ անձի վերաբերյալ քննարկում չի եղել: Ինչ վերաբերում է հարցին, թե դուք էլ եք ցանկանո՞ւմ, որ Սերժ Սարգսյանը լինի վարչապետ, ՀՀԿ խմբակցության ղեկավարը հարցը որակեց պրովոկացիոն եւ ասաց, թե գիտի` ո՛ւմ է ցանկանում, եւ գիտի` ո՛ւմ է առաջադրելու:
Հետևեք մեզ Viber-ում
