Բաքուն այս տարի չի ավելացնելու նավթի արդյունահանումը

Ադրբեջանը պաշտպանում է նավթի արդյունահանումը սառեցնելու  ՕՊԵԿ-ի մի շարք երկրների նախաձեռնությունը։ Այս մասին Ադրբեջանի պետական նավթային ընկերության նախագահ Ռովնագ Աբդուլաևը հայտարարել է Բաքվի ԱՆՍ հեռուստաընկերությանը տված հարցազրույցում։ Ինչպես տեղեկացնում է «Արմենպրես»-ը, վկայակոչելով ՏԱՍՍ-ը, նրա խոսքով, «այդ ուղղությամբ քայլեր արդեն արվել են»։ «Մենք արդեն միանում ենք այդ դիրքորոշմանը։ Մենք մտադիր ենք  2016 թվականին սառեցնել նավթի արդյունահանումը, այսինքն՝ պահպանել նույն մակարդակի վրա, և արդեն դադարեցրել ենք արդյունահանման մեծացման նախագծերը։ Ադրբեջանում նավթի արդյունահանումը կմնա ճի գերազանցի նախորդ տարվա մակարդակը»,- ասել է SOCAR-ի ղեկավարը։ Դրա հետ մեկտեղ, Ադրբեջանի էներգետիկայի նախարարությունը փետրվարի կեսերին հայտարարել է, որ երկրիը չի ծրագրում սառեցնել նավթի արդյունահանումը։ Ինչպես «Թրենդ»-ին հայտնել էր էներգետիկայի փոխնախարար Նաթիգ Աբասովը,  «Ադրբեջանի բաժընն աշխարհում արդյունահանման ընդհանուր ծավալի մեջ աննշան է և չի ազդում գնագոյացման վրա»։ Ադրբեջանում նավթի արդյունահանման ծավալը 2015թ.-ին կազմել է 41,689 մլն տոննա, իսկ այս տարի կանխատեսվում է  40,7 մլն տոննայի արդյունահանում։ Ներկայում բանակցություններ են վարվում աշխարհում նավթի արդյունահանման սառեցման շուրջ։ Փետրվարի 16-ին Դոհայում ՕՊԵԿ-ի անդամ Սաուդյան Արաբիայի, Քաթարի, Վենեսուելայի նավթի նախարարները և ՌԴ էներգետիկայի նախարար Ալեքսանդր Նովակը քննարկել են նավթի շուկայում գների հետ կապված իրավիճակի բարելավման հնարավորությունները։ Ըստ ՌԴ էներգետիկայի նախարարության՝ կողմերը հայտնել են արդյունահանման միջին ծավալները 2016 թվականին հունվարի մակարդակի վրա պահելու պատրաստակամություն, եթե նավթ արտադրող մյուս երկրները միանան այդ նախաձեռնությանը։