Սևանա լճում անհետացած ձկնորսներից երկրորդի դին ևս հայտնաբերվեց

Փրկարարները հայտնաբերել են Սևանա լճում անհետացած երկու ձկնորսներից երկրորդի՝ 1993 թ. ծնված Ա. Ա.-ի դին։ Մարտի 6-ին, ժամը 07.30-ին Սևանա լճում վերսկսվել են որոնողական աշխատանքները: Ինչպես տեղեկացրին ՀՀ արտակարգ իրավիճակների նախարարության հասարակայնության հետ կապերի բաժնից, ժամը 09.37-ին Սևանա լճում՝ ափից մոտ 5 կմ հեռավորությունից, ջրափրկարարները ջրից դուրս են բերել 1974 թ. ծնված Ա. Վ.-ի, իսկ ժամը 13.55-ին՝ 1993 թ. ծնված Ա. Ա.-ի դիերը: Մարտի 4-ին, ժամը 11.50-ին ահազանգ է ստացվել, որ մարտի 3-ին Ա. Ա.-ը (ծնվ. 1993 թ.) և Ա. Վ.-ը (ծնվ. 1974 թ.) Գեղարքունիքի մարզի Նորատուս գյուղի մոտակա ափից դուրս են եկել Սևանա լիճ` ձկնորսության, և չեն վերադարձել. անհրաժեշտ է փրկարարների օգնությունը: Դեպքի վայր են մեկնել ՄՓՎ ՕԽ-ն, ՀՋՋ-ի նավը և մեկ մարտական հաշվարկ (ջրափրկարար): Ժամը 19.14-ին մթության պատճառով որոնողական աշխատանքները դադարեցվել են: Մարտի 5-ին, ժամը 09.15-ին Սևանա լճում Ա. Ա.-ի (ծնվ. 1993թ.) և Ա. Վ.-ի (ծնվ. 1974թ.) որոնողական աշխատանքները վերսկսելու նպատակով դեպքի վայր է մեկնել ՄՓՎ օպերատիվ խումբը՝ ջրափրկարարներով, փ/ծ գնդապետի գլխավորությամբ: Ժամը 10.15-ից մինչև 16.15-ը իրականացվել են որոնողական աշխատանքներ: Ժամը 16.17-ին, անբարենպաստ եղանակային պայմաններից ելնելով, որոնողական աշխատանքները դադարեցվել են: