Կարեն Կարապետյանի դեմ նոր ալիք է բարձրանում

Չնայած հայտնի է, թե ով է լինելու ՀՀ հաջորդ վարչապետը, որը նոր Սահմանադրության համաձայն դառնալու է Հայաստանի թիվ մեկ պաշտոնյան, սակայն գործող վարչապետ Կարեն Կարապետյանի դեմ կրքերը նոր թափ են ստանում: Երեկ ԱԺ հայտարարությունների ժամին «Ծառուկյան» խմբակցության պատգամավորները մեկը մյուսի հետևից իրենց հայտարարությունները նվիրում էին Կարեն Կարապետյանին և նրա ղեկավարած կառավարությանը: Նիստի ավարտից հետո անգամ ՀՀԿ-ականներն էին կատակում, թե Կարեն Կարապետյանի բախտը չի բերել, խորհրդարանի երկրորդ ուժը ընկել է նրա հետեւից:  Վահե Էնֆիաջյանին հուզում էր առողջապահության նախարարության նոր ձեռնարկը՝ ծխելու դեմ օրենքի նախագիծը, որի նախնական տարբերակը արժանացավ հանրության դժգոհությանը, քանի որ ծխողների համար չթույլատրված վայրերում սահմանված տուգանքները Հայաստանի պայմաններում տրամաբանությունից զուրկ են: Պատգամավորը վրդովված բացատրություն էր պահանջում՝ ինչու պետք է  ծխողներին տուգանել 250 հազար դրամով, եթե -անգամ եվրոպական երկրներում, որտեղ միջին աշխատավարձը նվազագույնը 700 եվրո է , 70-200 եվրո տուգանք է սահմանված: Գեւորգ Պետրոսյանն անդրադարձավ կառավարության նիստերը դռնփակ անցկացնելու որոշմանը կարծիք հայտնելով, որ վերջին ժամանակներում ՀՀ կառավարությունը չի զլանում տարբեր անակնկալներով զարմացնել ու զայրացնել հանրությանը. «Էդ ումի՞ց են գաղտնի պահում, ի՞նչ են գաղտնի պահում, ումի՞ց թաքուն են ուզում ինչ որոշել»: Նա ասաց, որ եթե ԱԺ-ն հրապարակային է գործում, ինչո՞ւ է կառավարությունը ոչ հրապարակային ուզում կյանքի կոչել օրենքները: Գեւորգ Պետրոսյանը դիմեց ԱԺ փոխնախագահ Էդուարդ Շարմազանովին, որը կառավարության նիստերը դռնփակ անելու որոշումն արդարացրել էր՝ ասելով, որ Գերմանիայում էլ է դռնփակ. «Հարգելի գործընկեր, չեմ վիճարկում, գուցե այդպես է, բայց  մենք ինչու ենք Եվրոպային հիշում այն ժամանակ, երբ մեզ պետք է օրենսդրական նախագծեր անցկացնել, եկեք եվրոպային հիշենք, Գերմանիային հիշենք, որտեղ Սահմանադրության 1-ին հոդվածի համաձայն երաշխավորվում է անձի արժանապատվությունը, որն անձեռնմխելի է, 15-րդ հոդվածի համաձայն աշխատանքի իրավունքը երաշխավորվում է, պետությունը ապահովում է համապատասխան աշխատանքով, մի՞թե Գերմանիայում մանկավարժը սոված է, մի՞թե գիտնականը սոված է, մի՞թե Գերմանիայի Ազգային ժողովի բակերում մուրացկաններ են շրջում ու հետապնդում են պատգամավորներին, եկեք այս հարցերում էլ հիշենք Գերմանիային»: Նա կոչ արեց այդ որոշումից հրաժարվել: Լուիզա Սարգսյանն էլ վերլուծել էր Կարեն Կարապետյանի դավոսյան հայտարարություններն ու կոչը, որպեսզի մարդիկ էլ ավելի ինտենսիվ ներդրումներ կատարեն Հայաստանում, որտեղ վարչապետի գնահատականով կան նպաստավոր պայմաններ: Վերլուծել էր ու ասում էր, որ այդ ամենը սուտ է, իրականում ոչ մի պայմաններ էլ չկան, դրանով պայմանավորված է ներդրումների բացակայությունը: Նաիրա Զոհրաբյանը լրջագույնս մտահոգված էր Միջհամայնքային միավորումների մասին օրենքի նախագծով, որն ըստ նրա  փնթի է եւ  մի դրույթը հակասում է  մյուսին, մեկ այլ դրույթ հակասում է ՏԻՄ մասին օրենքին, իսկ ընդհանրապես օրենքի նախագիծը հակասում է սթափ տրամաբանությանը.  «Օրենքի նախագում գրված է միջհամայնքային միավորումը հանրային շահերից ելնելով ստեղծված համայնքային միավորումն է, այսինքն՝ հանրային շահը նշանակում է, որ պետք է հաշվի առնվի հանրության, համայնքների տեսակետը, բայց մեկ այլ դրույթով միջհամայնքային միավորում ստեղծելու երկու տարբերակ կա՝ կամավոր և օրենքով, այս դեպքում օրենքովը հասնակում ենք, որ պարտադիրն է։ Կառավարության ներկայացուցիչը չկարողացավ որևէ հիմնավոր պատճառաբանություն նշել,  թե ինչու է այսօր նման հրատապ կերպով անհրաժեշտ գնալ միջհամայնքային միավորումներ ստեղծելու ճանապարհով»,- մանրամասնեց պատգամավորը։ Նրա կարծիքով՝ նախագիծը րոպե առաջ պետք է հետ տարվի։ «Ես անգամ չեմ մտածում, որ խնդիրն այնքան պարզունակ է, որ ինչ-որ միջազգային կազմակերպություններից գրանտների պատճառով են գնում նման ափալ-թափալ քայլերի։ Ոչ, ես այստեղ շատ ավելի լուրջ քաղաքական ենթատեքստեր եմ տեսնում՝ առաջիկա ընտրությունների հետ կապված»։ Արձանագրենք, որ վարչապետի դեմ երկրորդ ալիքի մեկնարկը տրված է: Առաջինը անցած տարվա վերջին էր, այս խմբակցության պատգամավորները այդ գրոհը փաթեթավորում էին Առինջ մոլի առեւտրականների շահերի պաշտպանության  ներքո եւ ասում էին, որ ոչ թե վարչապետի հետ է իրենց խնդիրը, այլ առեւտրականների համար: Հիմա բարձրանում է երկրորդ ալիքը, թեպետ Կարեն Կարապետյանը չի լինելու ապագա վարչապետը: Ինչ է սա նշանակում եւ միթե իրականում անհանգստացնում է ԲՀԿ-ին, թե շահագրգիռ շրջանակները կրակից շագանակներ է հանում Ծառուկյանի միջոցով՝ Կարեն Կարապետյանին ասելով, որ ըմբոստանալու դեպքում կարող է արժանանալ Տիգրան Սարգսյանի ճակատագրին: Անի Սահակյան