Փոխնախարար դարձած նախկին փաստաբանը համամիտ չէ
Ազգային ժողովում «Անվտանգության խորհրդի կազմավորման և գործունեության մասին» օրենքի նախագծի քննարկման ընթացքում ՀՀ արդարադատության նախարարի առաջին տեղակալ Արթուր Հովհաննիսյանը, պատասխանելով «Ելք» խմբակցության պատգամավոր Էդմոն Մարուքյանի դիտարկմանը, թե Սահմանադրությունը ՀՀ առաջին փոխվարչապետի պաշտոն չի նախատեսում, սակայն մեկ այլ օրենքով առանձնացվել է առաջին փոխվարչապետի պաշտոն, ինչը հակասում է Սահմանադրությանը, ասաց, որ համամիտ չէ այդ կարծիքին: Ըստ նրա՝ Սահմանադրությունն այս հարցում որևէ արգելք չի նախատեսում: «Առաջին փոխվարչապետ ասելով՝ մենք փոխվարչապետին առանձնացնում ենք միայն լիազորությունների շրջանակով: Դա հիմնականում վարչապետի բացակայության պարագայում նրան փոխարինելու լիազորությունն է: Իսկ այդ հարցին Սահմանադրությունը հպանցիկ անդրադարձել է՝ նշելով, որ փոխվարչապետներից մեկը վարչապետի սահմանած կարգով նրա բացակայության պարագայում կփոխարինի վարչապետին, սակայն սահմանված չէ, թե ով է լինելու այդ փոխարինողը: Մենք օրենքով այդ լիազորությունը տալիս ենք փոխվարչապետներից մեկին՝ անվանելով նրան առաջին փոխվարչապետ»,- ասաց Հովհաննիսյանը: Փոխնախարարը նշեց, որ Սահմանադրության 147-րդ հոդվածը հստակ սահմանում է, որ կառավարության գործունեության կարգը սահմանվում է օրենքով, իսկ այդ կարգի մեջ տեղավորվում է նաև վարչապետի փոխարինողի հարցի կարգավորումը:
Հետևեք մեզ Viber-ում
