«Պարոն Խաչատրյան, այդ մասը խնդրում եմ դուք վերցրեք ձեր վրա». վարչապետ
ՀՀ տնտեսական զարգացման և ներդրումների նախարարի տեղակալ Տիգրան Խաչատրյանը կառավարության այսօրվա նիստին ներկայացրեց Արտոնագրային հարկի ամսական դրույքաչափերի կիրառման համար սահմանամերձ գյուղերի ցանկը սահմանելու մասին կառավարության որոշման նախագիծը: «ՀՀ հարկային օրենսգրքով սահմանամերձ գյուղերի համար նախատեսվել էր արտոնագրային հարկի առավել ցածր դրույքաչափեր, միաժամանակ, ՀՀ հարկային օրենսգրքով սահմանվել էր, որ ՀՀ կառավարությունը հաստատելու է այն սահմանամերձ գյուղերի ցանկը, որտեղ գործունեություն իրականացնող տնտեսվարող սուբյեկտները օգտվելու են արտոնագրային հարկի ավելի ցածր դրույքաչափերից: ՀՀ նախագծով առաջարկվող սահմանամերձ գյուղերի ցանկում սահմանված են արտաքին սահման ունեցող ՀՀ ինը մարզերից 203 սահմանամերձ գյուղ, որտեղ արտոնագրային հարկի ամսական դրույքաչափը, կախված գործունեության տեսակից, շուրջ 3-ից 7 անգամ ավելի ցածր է լինելու, քան այլ բնակավայրերում համանման գործունություն իրականացնելու համար սահմանված արտոնագրային հարկի դրույքաչափերն են», - ասաց փոխնախարարը։ Վարչապետ Կարեն Կարապետյանն էլ հանձնարարեց. «Պարոն Խաչատրյան, այդ մասը խնդրում եմ դուք վերցրեք ձեր վրա, մի հատ հասկանանք, թե այն արտոնությունները, որ տվել ենք, ինչին է բերում, ինչ քայլեր ունենք անելու, նաև շուկայի վրա ոնց է ազդում»:
Հետևեք մեզ Viber-ում
