ԲՀԿ-ում քննարկվել է Արմեն Սարգսյանի հարցը. Իվետա Տոնոյան

ՀՀ ԱԺ «Ծառուկյան» խմբակցության պատգամավոր Իվետա Տոնոյանը լրագրողների հետ զրույցում տեղեկացրեց, որ «Ծառուկյան» դաշինքը առաջիկա մեկ երկու օրվա ընթացքում կհանդիպի ՀՀԿ կողմից նախագահի թեկնածու առաջարկված Արմեն Սարգսյանի հետ: Այնուհետև նա  բոլորին հորդորեց թույլ տալ, որպեսզի իրենք որոշեն, թե ովքեր են մասնակցելու, եւ ընդհանրապես ինչ ձեւաչափով է տեղի ունենալու այդ հանդիպումը, և նշեց նաև, որ օրերս «Ծառուկյան» դաշինքում Գագիկ Ծառուկյանի գլխավորությամբ տեղի է ունեցել աշխատանքային քննարկում, որտեղ քննարկվել է նաև Արմեն Սարգսյանի թեկնածության հարցը և պատգամավորների կողմից հնչել են տարբեր գնահատականներ ՀՀԿ առաջարկած թեկնածուի վերաբերյալ։ «Հանդիպմանը մասնակցելու են խորհրդարանական խմբակցության պատգամավորները. բազմաթիվ են հարցերը, որոնք հուզում են պատգամավորներից շատերին` կապված Սահմանադրությամբ ամրագրված նախագահի թեկնածուի գործունեության ոլորտների եւ շրջանակների հետ: Պատգամավորներից որեւէ մեկը կաշկանդված չէ իրեն հուզող բազմաթիվ հարցեր ուղղելու նախագահի թեկնածուին եւ ստանալու պատասխաններ»,- ասաց Տոնոյանը: Հարցին, թե Արմեն Սարգսյանի անձի հանդեպ դրական տրամադրվածություն ունե՞ն իրենց խմբակցությունում, նա պատասխանեց. «Շատ տարբեր են եղել գնահատականները, սակայն դրանց բովանդակային մասին կանդրադառնամ այն ժամանակ, երբ արդեն իսկ նախագահի թեկնածուի հետ հանդիպումը կայացած կլինի»: