Կան արտոնյալներ, հարկ չվճարողներ. մատնանշում է Մանե Թանդիլյանը

Շառլ Ազնավուրի հրապարակում  «Ելք» դաշինքի հանրահավաք-երթին այդ նույն խմբակցության պատգամավոր Մանե Թանդիլյանն ասաց, որ փոփոխություն անողը ՀՀ քաղաքացին է: Մանե Թանդիլյանը նշեց, որ Արժույթի միջազգային հիմնադրամը հայտարարել է, որ Հայաստանում 30-50 տոկոս ստվերային տնտեսություն կա, ինչը նշանակում է, որ կան արտոնյալներ, հարկ չվճարողներ: Նա նաև ընդգծեց, որ առաջին անհրաժեշտության ապրանքներն են թանկացել: «Փոփոխություններ կարող ենք անել՝ բացառապես տեր կանգնելով մեր իրավունքին և մեր պահանջներին։ Մենք կարող ենք նվազեցնել այդ թանկացումները, բերել նախնական վիճակին, եթե վարենք խելամիտ քաղաքականություն։ 30 տոկոս աղքատ երկրում շքեղ ապրող օլիգարխների գույքը պետք է հարկել, որի արդյունքում՝ ֆինանսական բեռը յուրաքանչյուր քաղաքացու վրա կլինի հավասարաչափ բաշխված և արդարացի, և որևէ մեկը չի կարծի, որ միայն ինքն է այս երկրում հարկ վճարում, այլ հարկ են վճարում այն արտոնյալ հարկատուները, ում կարելի է հարկ չվճարել։ Միջազգային արժույթի հիմնադրամը հրապարակել է, որ Հայաստանում 30-50 տոկոս ստվերային տնտեսություն կա։ Իշխանություններն ասում են, թե գները կարգավորում են շուկայական հարաբերություններում, բայց չեն ասում, որ անհրաժեշտ է ապահովել մրցակցային պայմաններ, որի արդյունքում են գոյանում արդարացի գներ: Նրանք չեն ասում, որ թանկացումները տեղի են ունեցել հարկային փոփոխությունների արդյունքում: Մենք ունենք առաջարկություն՝ նվազեցնել թանկացումները, բերել նախնական վիճակին, եթե վարենք խելամիտ քաղաքականություն»,- հայտարարեց նա: