Պետությունը սկսում է նստել «պարտքի ասեղի վրա»
«Մոսկվա» կինոթատրոնի հարակից հրապարակում «ԵԼՔ » դաշինքի նախաձեռնած՝ ընդդեմ թանկացումների երկրորդ հանրահավաք-երթին խմբակցության պատգամավոր, «Հանրապետություն» կուսակցության նախագահ Արամ Սարգսյանն իր ելույթում ասաց, որ ՀՀ կառավարության ղեկավարը ասում է՝ ժողովո՛ւրդ ջան, այս թանկացումներն անում ենք քո համար, որովհետև դա քեզ շատ է պետք, և եթե ուրիշ երկրներում մինչև 10 տոկոս է, մեզ մոտ 2 տոկոս է։ Այնպես որ մեր նկարները տարեք, ձեր տանը փակցրեք պատին, տակը մոմ վառեք, շնորհակալ եղեք, որ որքան իմաստուն իշխանություն ունեք: «Ժողովո՛ւրդ ջան, խնդիրը միայն թանկացումները չէ, այս թանկացումներով միայն մեր կյանքը ծանր դարձնելը չէ, այլ ավելի շատ գլոբալ է և վերաբերում է ՀՀ տնտեսությանը, տնտեսության կայունացմանը, այդ տնտեսության ողջ մնալուն»,-ասաց նա: Նա նշեց, որ իշխանությունը ուշադրություն չի դարձնում կրթությանը, բիզնեսին, արդյունաբերությանը, էներգետիկային, ասաց, որ ջրային ռեսուրսները չենք օգտագործում, սրանք են, որ բյուջեն կարգի են բերելու, տնտեսություն են զարգացնելու, քանի որ իշխանությունը դրանց ուշադրություն չի դարձնում, մեր քաղաքացիներ գնում են ուրիշ երկրներ: Նրա համոզմամբ՝ երկիրը պարտք է վերցնում պարտք փակելու համար և նշեց, որ այդ պետությունը սկսում է նստել «պարտքի ասեղի վրա»: «Հետևաբար մեզ նոր բան է պետք հորինել, հրաշք է պետք, այնպիսի հրաշք, ինչպիսին Սինգապուրում, Իսրայելում է: Եթե ընդհանուր նայենք ու ասենք, որ այս տնտեսությունը կով է, որը կաթ է տալիս, նրանք լրացուցիչ այդ կովից անընդհատ կաթ են ուզում և վերջնական հասցնելու են նրան, որ այդ կովը սատկի: Մենք առաջարկում ենք գնել նոր կով և բյուջեի մուտքերը ավելացնել դրանով: Տարբերակ չէ ասել, որ կուռուպցիայի դեմ մի պայքարեք, մի գողացեք, քանի որ իրենք իրենց դեմ չեն պայքարի»,-ասաց նա և նշեց, որ այնպիսի լուծում պետք է առաջարկեն, որ իշխանությունն էլ համաձայնի, և լուծումը գիտելիքն է:
Հետևեք մեզ Viber-ում
