Սա նախագահի ձեռքից այդ իրավունքը վերցնելու նախագիծ է. Մարուքյան
Կառավարության կողմից ԱԺ ներկայացված «Ներման մասին» նոր օրինագիծը ներկայացրեց Արդարադատության փոխնախարար Սուրեն Քրմոյանը՝ նշելով, որ եթե Հայաստանում դատապարտյալների ներման հետ կապված հարաբերությունները մինչև հիմա կարգավորվում էին ՀՀ նախագահի հրամանագրով, իսկ հիմա դրանք պետք է կարգավորվեն առանձին օրենքով: Ըստ այդմ, նաև ներման միջնորդություն ներկայացնելու ինստիտուտ է ամրագրվել օրենքում, այսինքն՝ նախ պետք է դատապարտյալը ներում հայցի, որից հետո միայն կարող են այլ անձինք միջնորդել: «Ելք» խմբակցության պատգամավոր Էդմոն Մարուքյանը, անդրադառնալով նախագծին, նկատեց, որ դատապարտյալներին ներում շնորհելու իրավունքը նախագահի ձեռքից վերցնելու նախագիծ է։ «Այդ ինչպե՞ս է ստացվում, որ ՀՀ նախագահին ներման միջնորդություն ներկայացնող անձը վարչապետն է: Սահմանադրության 135-րդ հոդվածը հստակ նշում է, որ ՀՀ նախագահը օրենքով նախատեսված դեպքերում և կարգով լուծում է դատապարտյալներին ներում շնորհելու հարցը: Սա նախագահից ներում շնորհելու իրավունքը վերցնելու նախագիծ է: Ես կարծում եմ, որ, որ նախագահը ինքը պետք է քննի ներում շնորհելու մասին դատապարտյալի դիմումը և ինքն էլ ներում շնորհի նրան և ոչ թե վարչապետը քննարկի, առաջարկի նախագահին և առաջարկին էլ կից ներկայացնի որոշման նախագիծ»: Արդարադատության փոխնախարարն էլ ասաց, որ ՀՀ նախագահը կարող է եռօրյա ժամկետում իրավական ակտը իր առաջարկություններով վերադարձնել առաջարկություն ներկայացնող կամ միջնորդությամբ դիմող մարմին: Այս դեպքում՝ ընտրվել է, որ առաջարկություն ներկայացնող մարմինը վարչապետն է: Մարուքյանն առարկեց, որ Սահմանադրության այդ հոդվածից չի բխում, որ առաջարկություն ներկայացնողը պետք է վարչապետը լինի, կարող է Հանրային խորհրդի նախագահն առաջարկել: «Ասենք վարչապետն առաջարկել է X մարդուն ներում շնորհել, նախագահն էլ դրան համաձայն չէ, դրա ի՞նչն է վիճարկելու նախագահը ՍԴ-ում: Նախագահը ներման առաջարկությունից հետո երկու տարբերակ ունի, կամ ստորագրում է վարչապետի առաջարկը, կամ պետք է դիմի ՍԴ»,- եզրափակեց Մարուքյանը:
Հետևեք մեզ Viber-ում
