Ռուբեն Հայրապետյանը՝ Սարյան պուրակի հետ առնչություն ունենալու մասին.ՀԺ

Հայաստանի ֆուտբոլի ֆեդերացիայի նախագահ Ռուբեն Հայրապետյանը պնդում է, որ ինքն ու իր ընտանիքի անդամները կապ չունեն Երեւան քաղաքի Սարյան պուրակի վարձակալման հետ: Ռուբեն Հայրապետյանը «Հայկական ժամանակ»-ին պարզաբանում է ուղարկել, որում ասված է. «Հայկական ժամանակ» օրաթերթում 03.02.2018թ. եւ «Armtimes.com» կայքում 04.02.2018թ. հրապարակված «Տարոն Մարգարյանը վերանայել է իր որոշումը՝ հանուն Ռուբեն Հայրապետյանի ծրագրերի» նյութի հետ կապված հայտարարում եմ, որ ես կամ իմ ընտանիքի անդամներից որեւէ մեկը առնչություն չունի Սարյանի պուրակի վարձակալության հետ»: Մենք գրել էինք, որ Երեւանի քաղաքապետ Տարոն Մարգարյանը վերանայել է իր նախկին որոշումներից մեկը եւ խզել է «Կոլորիտ» ՍՊԸ-ի հետ կնքած վարձակալության պայմանագիրը: Ընկերության տնօրենը մտավախություն էր հայտնել, որ տարիներ շարունակ իր կողմից վարձակալված տարածքը ցանկանում են խլել իրենից, իսկ նկարների բացօթյա վաճառքը վտանգի տակ է: Հիշեցնենք, որ «Հայկական ժամանակ»-ի տեղեկություններով, պուրակը վարձակալելու մտադրություն ունի Հայաստանի ֆուտբոլի ֆեդերացիայի նախագահ Ռուբեն Հայրապետյանը: Պուրակի վերջնամասում՝ Մոսկովյան փողոցի եւ Բաղրամյան պողոտայի հատման մասում տեղակայված երկհարկանի շինության առաջին հարկը պատկանում է Հայրապետյանին, սակայն ձեւակերպված է մորաքրոջ որդու՝ Արայիկի անունով: Շենքի երկրորդ հարկը պատկանում է «Վիվարո» ընկերությանը: Երկհարկանի շինության ետնամասը Սարյանի պուրակի մեջ է գտնվում եւ շատ հարմար է դեպի պուրակ ընդլայնվելու համար: Որոշ տեղեկություններով, շինության առաջին հարկը տարիներ առաջ գրավադրված է եղել Ռուբեն Հայրապետյանին պատկանող «ADB» բանկում, որից հետո դարձել է Հայրապետյանի սեփականությունը: