Ապարանցի Ռազը կապ չունի. ազատամարտիկը մանրամասնում է

«Ինձ ոչ մեկը հարցաքննության չի կանչել, կապ չունեմ Նորք-Մարաշում վնասազերծված զինված խմբավորման հետ»,-Հայելի.am-ի թղթակցի հետ զրույցում ասաց  «Ազատամարտիկների դաշինքի» խորհրդի անդամ Ռազմիկ Պետրոսյանը (Ապարանցի Ռազ) : Ազատամարտիկը հերքում է տարածված այն լուրերը, որ իրեն Երևանի Նորք Մարաշի 9-րդ փողոցի տներից մեկում 2015-ի նոյեմբերի 25-ին, Ազգային անվտանգության ծառայության աշխատակիցների կողմից վնասազերծված զինված խմբի գործի շրջանակներում կանչել են հարցաքննության: Նշենք, որ այս գործի շրջանակներում ձերբակալվել են մի շարք հայտնի ազատամարտիկներ: Այդ թվում «Տիգրան Մեծ» ջոկատի հրամանատար Վլադիմիր Առաքելյանը: Անդրադառնալով այս գործի շրջանակներում  ազատամարտիկների ձերբակալություններին՝ Պետրոսյանն ասաց, որ ազատամարտիկների ձերբակալությունը համարում է քաղաքական հետապնդում. «Իրավական գնահատականներ չեմ կարող տալ, սակայն շատ լավ ճանաչելով մեր ընկերներին հայտարարում եմ, որ բնրանք չեն կարող իրենց երկրի անվտանգության դեմ որևէ ոտնձգություն անել: Այն մարդն, ով իր հայրենիքի համար կյանքն է տվել, չի կարող նրան վնաս հասցնել»,- ասաց Ռազմիկ Պետրոսյանը։ «Ապարան» ջոկատի հրամանատարը չի բացառում, որ ազատամարտիկներից ոմանք կարող էին հանդիպումներ ունենալ զինված խմբավորման ղեկավար Արթուր Վարդանյանի հետ, ով նույնպես ազատամարտիկի (Շռամ Վալերիկ) տղա է.«Չի բացառվում, որ ազատամարտիկներից ոմանք  նրա  հետ զրույցներ ունեցած լինեն, բայց եթե ազատամարտիկն իմանար, որ նրանցից որևէ մեկը վտանգ է ներկայացնում իր հայրենիքի համար, առաջինը նրանք վտանգի դեմը կառնեին: Եթե ազատամարտիկներն այնտեղ են եղել, ուրեմն այդ խումբն իրենից վտանգ չի ներկայացրել: Նախաքննությունը ընթացքի մեջ է: Սպասենք,  գուցե ներկայացվող ճշմարտությունը գոհացնի: Քաղաքական խնդիր լինելու առումով էլ ասեմ, որ եթե այդպես լինի ուրեմն խայռառակություն է…»,-եզրափակեց Ռազմիկ Պետրոսյանը: Աստղիկ Ավագյան