Հորդանանում եկեղեցում տեղի ունեցած կոտորածի համար մահապատժի են դատապարտել երեք տղամարդու
Հորդանանի դատարանը եկեղեցում տեղի ունեցած նախճիրի համար կախաղանի միջոցով մահապատժի է դատապարտել երեք տղամարդու։
Հոկտեմբերի 23-ին տեղի ունեցած հարձակման հետևանքով զոհվել է 9 մարդ, վիրավորվել՝ 34-ը։ Բոլորը մասնակցում էին քրիստոնեական հուղարկավորության Քարաք նահանգի հույն ուղղափառ եկեղեցում, որտեղ գտնվում է նշանակալի քրիստոնեական համայնք։
Հորդանանի զինված ուժերը կիրակի օրը հայտարարեցին, որ հարձակվողները մեղավոր են ճանաչվել «ահաբեկչական գործողություններ» կատարելու, ինչպես նաև զենք պահելու, «ահաբեկչական կազմակերպության համար քարոզչություն» և «ահաբեկչական գործողություններ կատարելու դավադրության» համար։
Երեք հորդանանցիները՝ երկու եղբայր և նրանց փեսան, փախել էին հարձակման վայրից և ձերբակալվել երեք օր անց։ Նրանց ինքնությունը չի հրապարակվել։
Մնում է անհասկանալի, թե ինչու են հարձակվողները հենց այս եկեղեցին ընտրել` որպես իրենց թիրախ։
Հարձակումից կարճ ժամանակ անց Հորդանանի թագավոր Աբդուլլահ II-ը սոցիալական ցանցերում գրել է. «Քարաքի վրա ահաբեկչական հարձակումը կարժանանա հնարավոր ամենախիստ պատասխանին: Նրանք, ովքեր մոլորության մեջ են՝ մտածելով, որ կարող են իրենց գնդակներով բաժանել հորդանանցիներին, ոչ մի շանս չունեն մեր միասնության առջև»:
