Ռոմանոս Պետրոսյանը ստում է. թող տղամարդավարի ճշմարտությունն ասի. Դավիթ Ղազինյան․pastinfo.am

«2015 թվականին իշխանությունները խնդրել են, և Սամվել Կարապետյանը գնել է ՀԷՑ-ը, կատարել է 600 միլիոն դոլարի ներդրում: Այդ 600 միլիոն դոլարի ներդրումն արտացոլված է ՀԾԿՀ-ի կողմից ամեն տարի հաստատված ներդրումային ծրագրում: Սամվել Կարապետյանը ներդրել է նաև իր շահութաբաժինը: Կարապետյանի շահույթի մեծ մասը հատկացվել է ընկերության ներդրումային ծրագրերին»,- ասաց Ղազինյանը:

Նրա խոսքով՝ Սամվել Կարապետյանը սնանկացման գնացող ընկերությունը վերցնելուց հետո հոսանքի սակագինը չի թանկացրել, և դա այն դեպքում, երբ դրանից առաջ Երևանում տեղի էին ունենում ընդդեմ հոսանքի թանկացման ցույցեր, քանի որ հոսանքի սակագինը պետք է թանկանար 19 դրամով:

«ՀԷՑ-ն այդ ժամանակ ուներ 36 միլիարդ դրամի պակասուրդ: 10 տարի հոսանքի սակագինը չթանկացնելուց հետո Սամվել Կարապետյանը որոշել է իր շահույթի մի փոքր մասը վերցնել: ՔՊ-ն ժողովրդին ստում է հիմա ու հնչեցնում հարց, թե ինչու Սամվել Կարապետյանը պետք է շահույթ ունենար: Հ1-ի հաղորդավարը, հետևապես, պետք է նրան տար հետևյալ հարցերը՝ երբ է Կարապետյանն իր շահույթը վերցրել, ամբողջն է վերցրել, թե ոչ, կամ, օրինակ, ՔՊ-ի մատնանշած հենասյուների ինքնարժեքի հաշվարկը կա, թե ոչ. իմ տեղեկություններով՝ դրանց ինքնարժեքը շատ ավելի բարձր է, քան մենք ենք գնել»:

Դավիթ Ղազինյանը շեշտեց նաև, որ միայն մեկ օրինակով կարելի է փաստել՝ Հանրային հեռուստաընկերության եթերում Ռոմանոս Պետրոսյանը, պարզապես, սուտ տեղեկություններ է հայտնել ՀԷՑ-ի վերաբերյալ:

«Մեր ժամանակ հենասյուներ արտադրող ընկերությունը պարտավորվել էր հենասյուները տեղափոխել ՀԷՑ-ի նշած վայրը, օրինակ՝ Մեղրիից մինչև Տավուշ, իսկ Ռոմանոս Պետրոսյանի կառավարման օրոք արտադրող ընկերությունը նման պայմանագրային պարտավորություն չունի. տեղափոխումը պետք է իրականացնի ՀԷՑ-ը: Սուտ է նաև պնդումը, թե մեկ բեռնատարով հնարավոր է տեղափոխել 25-30 հենասյուն. թող ցույց տա բեռնատար, որը կարող է այդքան հենասյուն տեղափոխել»:

Պատգամավորը բացատրեց այն սխեման, որի հաշվին Ռոմանոս Պետրոսյանը կարողանում է խոսել գնումների ժամանակ ցածր գնով ապրանք ձեռք բերելու մասին:
«ՀԷՑ-ը, երբ խլեցին, նրանք պատրաստ էին ցածր որակի դիմաց ձեռք բերել անորակ ապրանք. օրինակ՝ կահույքի արտադրությամբ զբաղվող ընկերություն է անգամ մասնակցել հենասյուների գնման մրցույթին, իսկ դրա նպատակը ցածր գին առաջարկելն է եղել, մինչդեռ Սամվել Կարապետյանի կողմից դրվել էր հստակ պահանջ՝ առաջին հերթին ձեռք բերել որակյալ ապրանք, ոչ թե էժան և անորակ: Հիշեք՝ անկախ ամեն ինչից՝ ՀԷՑ-ը վերադարձվելու է իր իրական սեփականատիրոջը, որի պահանջով էլ առաջին հերթին ձեռք էր բերվել որակյալ ապրանք»,- խոսքը եզրափակեց Դավիթ Ղազինյանը։