Թրամփը պատրաստվում է երկիրը կառավարել հրամանագրերով

Թրամփը պատրաստվում է երկիրը կառավարել հրամանագրերով՝ Կոնգրեսի երկու պալատների նկատմամբ վերահսկողությունը դեմոկրատներին անցնելուց հետո, հայտնում են ԶԼՄ-ները։

Նոյեմբերի 3-ի ընտրությունների արդյունքում դեմոկրատների՝ Կոնգրեսի երկու պալատների նկատմամբ վերահսկողություն ստանալուց հետո Թրամփի վարչակազմը պատրաստվում է ընդլայնել գործադիր իշխանության լիազորությունների կիրառումը՝ սեփական քաղաքական օրակարգն առաջ մղելու նպատակով։

Ինչպես հայտնում է CNN-ը, նախագահի թիմը մի քանի ամիս շարունակ ուսումնասիրել է օրենսդիրների հավանությունը շրջանցելու հնարավորությունները։ Թրամփի խորհրդականները պնդում են, որ նախագահը պատրաստ է ընդլայնել նախագահական լիազորությունների սահմանները՝ իր նպատակներին հասնելու համար։

Reuters-ի տվյալներով՝ բարձրաստիճան պաշտոնյաները, այդ թվում՝ Սպիտակ տան աշխատակազմի ղեկավարի տեղակալ Սթիվեն Միլլերը և Կառավարման ու բյուջեի վարչության տնօրեն Ռասել Վոութը, ապրիլից Սպիտակ տան իրավաբանական խորհրդատուների հետ աշխատել են այն հրամանագրերի մշակման ուղղությամբ, որոնք Թրամփը կարող է ստորագրել առանց Կոնգրեսի համաձայնության։

Քննարկվող միջոցառումների թվում են՝

Ներգաղթ․ ներգաղթի օրենսդրության կիրառման խստացում, ինչպես նաև օտարերկրյա ուսանողներին և ժամանակավոր աշխատողներին վիզաների տրամադրման կանոնների խստացում։

Մաքսատուրքեր․ ռազմավարական նշանակության հանքանյութերի և հողմային տուրբինների ներմուծման նկատմամբ նոր մաքսատուրքերի սահմանում։

Դաշնային ծախսեր․ դրամաշնորհների տրամադրման կանոնների վերանայում, որպեսզի քաղաքական նշանակմամբ պաշտոնյաներն ավելի մեծ ազդեցություն ունենան ֆինանսական միջոցների բաշխման վրա։

Բնակարանների մատչելիություն․ շինարարության ծախսերի կրճատմանն ուղղված միջոցառումների իրականացում։

Սպիտակ տան իրավաբանական խորհրդատուները նաև ուսումնասիրում են, թե «ինչ կարող է Թրամփն օրինականորեն անել ինքնուրույն, որտեղ կարող է ընդլայնել իր լիազորությունների սահմանները և ինչպես կարող է պաշտպանել այդ որոշումները դատարանում»։

Reuters-ի փոխանցմամբ՝ Թրամփն ակնկալում է, որ կկարողանա «մեկ-երկու ամիս» վետո դնել դեմոկրատների օրենսդրական նախաձեռնությունների վրա, որից հետո հնարավոր կլինի փոխզիջումների հասնել։

«Կարծում եմ՝ ես կդառնամ «պարոն Վետո»։ Իսկ հետո, ինչ-որ պահի, հավանաբար, մենք համաձայնությունների կհասնենք»,– մեջբերում է գործակալությունը Թրամփի խոսքերը, որոնք նա ասել էր դեռևս ընտրությունների արդյունքների հրապարակումից առաջ։

Այնուամենայնիվ, հանրապետականների պարտությունից հետո Թրամփը Politico-ին հայտարարել է, որ մտադիր է «աշխատել դեմոկրատների հետ»։

Լրատվամիջոցներն ուշադրություն են հրավիրում այն հանգամանքի վրա, որ գործադիր իշխանության լիազորությունների ընդլայնումը չի վերացնում Թրամփի վարչակազմի համար գլխավոր վտանգը՝ խորհրդարանական հետաքննությունները։

Դեմոկրատները հնարավորություն կստանան պաշտոնյաներին հրավիրել լսումների, պահանջել փաստաթղթեր և ստուգել՝ արդյոք Թրամփն իր իշխանությունն օգտագործել է անձնական կամ իր դաշնակիցների շահերի համար։

Ինչպես նշում է CNN-ը, նոր Կոնգրեսը մշտական հետաքննություններով «անտանելի կդարձնի Թրամփի շրջապատում գտնվող բոլորի կյանքը», իսկ գործադիր իշխանության միջոցով երկիրը կառավարելու նախագահի փորձերը, ամենայն հավանականությամբ, կհանգեցնեն «երկարատև սահմանադրական բախումների»։