Ի՞նչ ունեցվածք ունի ԱԺ-ում ընդդիմադիրների հետ միջադեպի կենտրոնում հայտնված ՔՊ-ական Տիգրան Գալստյանը․ «Ժողովուրդ»

«Ժողովուրդ» օրաթերթը գրում է. ««Ժողովուրդ» օրաթերթը ուսումնասիրել է, թե ով է ԱԺ-ում ընդդիմադիր պատգամավորների հետ միջադեպի կենտրոնում հայտնված ՔՊ-ական նորաթուխ պատգամավոր Տիգրան Գալստյանը և ինչ ունեցվածք ունի։

Հիշեցնենք, որ հոկտեմբերի 30-ին Ազգային ժողովում տեղի ունեցած միջադեպի ժամանակ Գալստյանը հայտնվել էր իրարանցման կենտրոնում։ Միջադեպի տեսագրություններում երևում էր, թե ինչպես է նա փորձում մոտենալ ընդդիմադիր պատգամավորներին, իսկ ՊՊԾ աշխատակիցները փորձում են զսպել նրան։ «Ժողովուրդ» օրաթերթն ավելի վաղ անդրադարձել էր նաև նրա կենսագրությանը՝ նշելով, որ մինչ խորհրդարան մտնելը Գալստյանը հանրությանը լայնորեն հայտնի չէր։

Տիգրան Գալստյանը ծնվել է 1977 թվականի ապրիլի 2-ին Աշտարակում։ 1995-1997 թվականներին ծառայել է ՀՀ զինված ուժերում, պահեստազորի լեյտենանտ է։ 2006 թվականին ավարտել է Հայաստանի պետական ագրարային համալսարանը։ 2008-2026 թվականներին աշխատել է ՀՀ ԳԱԱ Ռադիոֆիզիկայի և էլեկտրոնիկայի ինստիտուտի տրանսպորտի տեղամասի պետ։ 2019-2026 թվականներին զբաղվել է նաև անհատ ձեռնարկատիրական գործունեությամբ։

Քաղաքական գործունեությունը հիմնականում ծավալել է Աշտարակում․ 2002-2021 թվականներին եղել է Աշտարակ քաղաքի ավագանու անդամ, իսկ 2021-2026 թվականներին՝ Աշտարակ համայնքի ավագանու «Քաղաքացիական պայմանագիր» խմբակցության անդամ։ 2026 թվականին դարձել է Ազգային ժողովի պատգամավոր։

Իսկ ի՞նչ ունեցվածք ունի նորաթուխ պատգամավորը։

Անշարժ գույք․

2025 թվականի տարեկան հայտարարագրի համաձայն՝ Տիգրան Գալստյանի անունով տարեվերջին գրանցված է եղել 7 հողամաս և 2 հասարակական նշանակության շինություն։

«Ժողովուրդ» օրաթերթը արձանագրեց, որ նրա անշարժ գույքի ցանկում առկա են 2010 և 2017 թվականներին ձեռք բերված հողամասեր, 2007 և 2020 թվականներին ձեռք բերված հասարակական նշանակության շինություններ, ինչպես նաև 2022 թվականին համատեղ ժառանգությամբ ստացած հողամաս։

«Ժողովուրդ» օրաթերթի ուսումնասիրության մեջ հատկանշականն այն է, որ 2025 թվականին Գալստյանը ձեռք է բերել ևս երեք հողամաս։ Մայիսի 13-ին Աշտարակում հողամաս է գնել 480 հազար դրամով, հունիսի 10-ին Իջևանում՝ 290 հազար դրամով, իսկ հունիսի 16-ին Աշտարակում ձեռք է բերել մեկ այլ հողամաս՝ 12 միլիոն 700 հազար դրամով։ Այս երեք հողամասերի ձեռքբերման համար նա ընդհանուր առմամբ վճարել է 13 միլիոն 470 հազար դրամ։

Տրանսպորտային միջոցներ․

Գալստյանը հայտարարագրել է երեք տրանսպորտային միջոց՝ 2024 թվականի արտադրության BYD, 2003 թվականի արտադրության MERCEDES-BENZ մակնիշի բեռնատար և 1999 թվականի արտադրության OPEL։ Դրանցից MERCEDES-BENZ-ը ձեռք է բերել 2020 թվականի հունվարի 15-ին, OPEL-ը՝ 2014 թվականի դեկտեմբերի 8-ին, իսկ BYD-ն՝ 2024 թվականի օգոստոսի 28-ին։

Դրամական միջոցներ․

2025 թվականի դեկտեմբերի 31-ի դրությամբ Գալստյանի բանկային հաշիվների մնացորդը կազմել է 2 միլիոն 534 հազար 214 դրամ։ Տարեսկզբին այդ գումարը 1 միլիոն 77 հազար 700 դրամ էր։

Բանկային ավանդը տարվա սկզբին և տարեվերջին մնացել է անփոփոխ՝ 3 միլիոն դրամ։

Կանխիկ դրամական միջոցների մասով տարվա վերջում նա հայտարարագրել է 13 միլիոն դրամ, 31 հազար ԱՄՆ դոլար և 2 հազար եվրո։ Տարեսկզբին կանխիկ գումարը կազմել է 15 միլիոն դրամ և 35 հազար ԱՄՆ դոլար, իսկ եվրո չի հայտարարագրել։

Եկամուտ․

«Ժողովուրդ» օրաթերթի ուսումնասիրության արդյունքում պարզ դարձավ, որ 2025 թվականի ընթացքում Գալստյանը հայտարարագրել է ընդհանուր 11 միլիոն 534 հազար 845 դրամ եկամուտ։ Այդ թվում՝ Ռադիոֆիզիկայի և էլեկտրոնիկայի ինստիտուտից ստացած աշխատավարձը կազմել է 985 հազար 471 դրամ, անհատ ձեռնարկատիրական գործունեությունից ստացած եկամուտը՝ 1 միլիոն 336 հազար 55 դրամ։

Նա հայտարարագրել է նաև վարձակալությունից ստացված մի քանի եկամուտ՝ Հակոբ Մանուկյանից՝ 179 հազար 999 դրամ, կնոջից՝ Անժելա Ազատյանից՝ 90 հազար դրամ, ինչպես նաև իր անունով հայտարարագրված վարձակալությունից՝ 324 հազար դրամ։

Բացի այդ, հայտարարագրում նշված են Ժիրայր Վարդանի Ղևոնդյանից ստացած 9 հազար 500 ԱՄՆ դոլարի և Հայկ Ռոբերտի Բարսեղյանից ստացած 8 հազար 500 ԱՄՆ դոլարի նվիրատվությունները։ Գալստյանը նաև 2 միլիոն դրամի վարկ է ստացել «ԱԿԲԱ Բանկ»-ից։ Տարեվերջին վարկի մայր գումարի մնացորդը կազմել է 1 միլիոն 888 հազար 888 դրամ։ Այսպիսով, խորհրդարան մուտք գործելուց հետո միջադեպի կենտրոնում հայտնված ՔՊ-ական պատգամավորը հայտարարագրել է յոթ հողամաս, երկու հասարակական նշանակության շինություն, երեք ավտոմեքենա, բանկային հաշիվների և ավանդի գումարներ, ինչպես նաև կանխիկ դրամական միջոցներ։ «Ժողովուրդ» օրաթերթը շարունակում է ուսումնասիրել պաշտոնյաների հայտարարագրերն ու նրանց ունեցվածքի փոփոխությունները»։

Մանրամասները՝ «Ժողովուրդ» օրաթերթի այսօրվա համարում։Ժողովուրդ օրաթերթ