Իրանից մի խումբ քաղաքացիներ հատել են Ադրբեջանի սահմանը

Ադրբեջանի պետական սահմանապահ ծառայության սահմանապահ զորքերի «Գոյթեփե» սահմանապահ ջոկատի ծառայողական տարածքում պետական սահմանի պահպանություն իրականացնող սահմանապահները նկատել են սահմանախախտների տեղաշարժը՝ Իրանի Իսլամական Հանրապետության կողմից դեպի Ադրբեջանի Հանրապետություն։

Այս մասին ԱՊԱ գործակալությանը հայտնել են Ադրբեջանի պետական սահմանապահ ծառայության մամուլի կենտրոնից։

Սահմանապահ ուղեկալն անմիջապես բերվել է մարտական պատրաստության, տարածքը շրջափակվել է, և ձեռնարկվել են անհրաժեշտ միջոցներ՝ պետական սահմանի խախտումը կանխելու համար։

Սահմանախախտների նկատմամբ հետապնդում է սկսվել։ Նրանց հրահանգվել է կանգ առնել, որից հետո օդ են արձակվել նախազգուշական կրակոցներ։ Սահմանախախտներից մեկը, չենթարկվելով հրամանին, զինված դիմադրություն է ցույց տվել և կրակ բացել՝ սահմանապահների կյանքին վտանգ սպառնալու նպատակով։

Սահմանապահների օրինական պահանջները անտեսած անձին ձերբակալելու նպատակով, Ադրբեջանի Հանրապետության «Պետական սահմանի մասին» օրենքի դրույթներին համապատասխան, զենք է կիրառվել, ինչի հետևանքով սահմանախախտը վնասազերծվել է։

Միջադեպի մասին իրանական կողմը տեղեկացվել է սահմանային ներկայացուցիչների միջոցով։

Դեպքի առթիվ քրեական գործ է հարուցվել։ Ներկայումս պետական սահմանապահ ծառայությունը Ռազմական դատախազության հետ համատեղ շարունակում է անհրաժեշտ օպերատիվ-հետախուզական և քննչական միջոցառումների իրականացումը։