Հայաստանը դեպի ծով ելք չունի, իսկ մենք առաջարկում ենք այն դարձնել տարածաշրջանի մյուս պետությունների հետ կապակցված երկիր. Հաջիև

Հայաստանը դեպի ծով ելք չունեցող երկիր է, իսկ մենք առաջարկում ենք այն դարձնել տարածաշրջանի մյուս պետությունների հետ կապակցված երկիր և նրա համար բացել տարբեր տրանսպորտային ուղիներ, այս մասին ամերիկացի տնտեսագետ, Կոլումբիայի համալսարանի պրոֆեսոր Ջեֆրի Սաքսին տված հարցազրույցում հայտարարել է Ադրբեջանի նախագահի օգնական Հիքմեթ Հաջիևը։

Նա նաև նշել է, որ Հայաստանի հետ երկկողմ հարաբերություններում Ադրբեջանը նույնպես փորձում է անցյալը թողնել հետևում։

«Որոշ վերքեր դեռ թարմ են, և մենք չենք կարող աչք փակել որոշ հիշողությունների վրա։ Սակայն միևնույն ժամանակ մենք նայում ենք դեպի ապագա՝ դեպի հավերժական խաղաղություն»,-ընդգծել է նա։

Հաջիևը հավելել է, որ երկու երկրներն արդեն հաստատել են առևտրային կապեր և աշխատում են տրանսպորտային կապերի ստեղծման ուղղությամբ։