Գերմանիայի խոշորագույն արդյունաբերական արհմիությունը մերժել է աշխատավարձի բարձրացման առաջարկը և սպառնացել գործադուլով

Գերմանիայի խոշորագույն արդյունաբերական արհմիությունը՝ IG Metall-ը, մերժել է գործատուների՝ աշխատավարձերի բարձրացման վերաբերյալ նախնական առաջարկը և նախազգուշացրել հնարավոր գործադուլների մասին, հայտնում է գերմանական dpa գործակալությունը։

Բանակցություններն ընդգրկում են մետաղամշակման և էլեկտրատեխնիկական արդյունաբերության ավելի քան 3,7 միլիոն աշխատողների, ներառյալ՝ երկրի համար առանցքային նշանակություն ունեցող ավտոմոբիլային հատվածը։

«Այդ առաջարկը չափազանց ուշ է ներկայացվել, այն չափազանց համեստ է, նախատեսված է չափազանց երկար ժամկետի համար և ապագայի համար գրեթե ոչինչ չի տալիս»,- հայտարարել է Հյուսիսային Ռեյն -Վեստֆալիայում IG Metall-ի տարածաշրջանային բաժանմունքի ղեկավար Կնուտ Գիսլերը։ Ըստ նրա՝ գործատուների առաջարկը էապես չի համապատասխանում աշխատողների սպասումներին, ուստի արհմիությունը կտրականապես մերժել է այն։

Գործատուների Gesamtmetall միավորումն առաջարկել է 2028 թվականի հուլիսից մշտապես բարձրացնել սակագնային դրույքաչափերը 1,3%-ով։ Հաջորդ տարվա համար հուլիսին նախատեսված է միանվագ վճարում՝ մինչև հարկերի պահումը միջին տարեկան աշխատավարձի 1%-ի չափով։ Միևնույն ժամանակ, վնասով աշխատող ընկերությունները կարող են չվճարել այդ գումարը։

Արհմիությունում կարծում են, որ նման պայմանները, հաշվի առնելով գնաճը, կհանգեցնեն աշխատողների իրական եկամուտների հետագա նվազմանը։ Սեպտեմբերին Գերմանիայում տարեկան գնաճը կազմել է 3,3%։

Բանակցությունների երկու փուլից հետո նախազգուշական գործադուլների հավանականությունն աճել է։ Դրանք կարող են սկսվել արդեն կիրակի, երբ կլրանա օրենքով սահմանված այն ժամկետը, որի ընթացքում գործադուլների անցկացումն արգելված է։

Գերմանիայի ամենախիտ բնակեցված դաշնային երկրամասում՝ Հյուսիսային Ռեյն- Վեստֆալիայում, արհմիության բանակցային հանձնաժողովը պետք է շաբաթ օրը որոշում ընդունի հետագա քայլերի վերաբերյալ։