Վարուժան Ավետիսյանը կրկին զինված ապստամբության կոչ է անում

Ժիրայր Սեֆիլյանի եւ մյուսների գործով նիստին այսօր Շենգավիթ վարչական շրջանի ընդհանուր իրավասության դատարան բերվեց նաև  «Սասնա ծռեր խմբի անդամ Պավել Մանուկյանը՝ ցուցմունք տալու: Մանուկյանից հետո պետք է հարցաքննվեր Վարուժան Ավետիսյանը: Վերջինս հրաժարվեց մոտենալ ամբիոնին եւ նրա պաշտպան Մուշեղ Շուշանյանն ասաց, որ դա իր դիրքորոշումն է ու այդ դիրքորոշման պատճառով չի կարող սահմանափակել Ժիրայր Սեֆիլյանի եւ Գեւորգ Սաֆարյանի իրավունքները՝ դատավարական ընթացակարգերի պատճառով: Սակայն Վարուժան Ավետիսյանը միայն տեղից սկսեց զինված ապստամբության կոչեր անել. «Հայաստանում դատարան չկա, դա ռեժիմի գործիք է եւ ես այստեղ եմ՝ պաշտպանների միջնորդությամբ: Պատրաստ եմ պատասխանելու պաշտպանական կողմի հարցերին, սակայն կպատասխանեմ նստած տեղից: Ես պարտավոր եմ լինել ՀՀ քաղաքացի, որպես ՀՀ քաղաքացի՝ ես ապստամբել եմ, զինված ապստամբություն եմ իրականացրել ազգադավ եւ ոճրագործ ռեժիմի դեմ եւ առիթից օգտվելով՝ կոչ եմ անում ժողովրդին նորից դիմել զինված ապստամբության եւ ազատագրվել գաղութային այս կախյալությունից»: Դատավորն ասաց, որ Վարուժան Ավետիսյանը ամբաստանյալի կարգավիճակում է, պարտավոր է կանգնել, եթե ոչ, կհեռացվի դատական նիստից և հեռացրեց նրան դատական նիստից: