Ուկրաինան հարվածել է Վորոնեժի ավիացիոն գործարանին և կամրջին․ երկու մարդ է զոհվել

Հոկտեմբերի 26-ի գիշերը ուկրաինական անօդաչու թռչող սարքերը զանգվածային հարձակում են իրականացրել Վորոնեժի վրա, հայտնել է Վորոնեժի մարզի նահանգապետ Ալեքսանդր Գուսևը։ Նրա տվյալներով՝ ընդհանուր առմամբ տարածաշրջանի երկնքում հայտնաբերվել է 113 դրոն, իսկ անմիջապես Վորոնեժի վրա՝ ավելի քան 70։ «Ցավոք, երկու մարդ զոհվել է (1960 և 1973 թվականներին ծնված տղամարդիկ), ևս 17-ը վիրավորվել են։ Վիրավորների թվում կա նաև մեկ երեխա։ Բոլորին արդեն ցուցաբերվում է բժշկական օգնություն»,- գրել է Գուսևը իր տելեգրամյան ալիքում։ Նա նշել է, որ տուժածների մի մասը եղել է Վորոնեժի արվարձանի ուղղությամբ շարժվող գնացքում։ Դրա վրա ընկել են խոցված դրոնի բեկորները։ «ՌԺԴ»-ում ճշտել են, որ գնացքը ուղևորվում էր Անապայից Մոսկվա։ Դրանում հինգ մարդ է վիրավորվել։

Գրոհի հետևանքով հրդեհվել են մի քանի արդյունաբերական ձեռնարկություններ, քաղաքի կենտրոնական հատվածում գտնվող գրասենյակային շենք, բազմաբնակարան շենք, դպրոցական մարզադաշտ, ինչպես նաև ավտոտնակային կոոպերատիվ, նշել է Գուսևը։ «Շենքերի ճակատային մասերի և պատուհանների վնասումներ են արձանագրվում քաղաքի գրեթե բոլոր շրջաններում»,- հավելել է նահանգապետը։ Ուկրաինական մոնիթորինգային Supernova+ ալիքի տվյալների համաձայն՝ հարվածի թիրախներից մեկը եղել է Վորոնեժի բաժնետիրական ինքնաթիռաշինական ընկերությունը (ՊԱՕ «ՎԱՍՕ»)՝ խոշոր ավիաշինական ձեռնարկություն, որը մտնում է Միավորված ավիաշինական կորպորացիայի (ՕԱԿ) կազմի մեջ և հանդիսանում է «Ս. Վ. Իլյուշինի անվան ավիացիոն համալիր» ԲԲԸ-ի («Իլ» ԲԲԸ) մասնաճյուղը։ «ՎԱՍՕ»-ն ռազմավարական նշանակություն ունի Ռուսաստանի ավիաշինական ճյուղի համար։ Հարվածի տակ է հայտնվել նաև Կենտրոնական շրջանը Երկաթուղային շրջանին միացնող Հյուսիսային կամուրջը։

Ինչպես ականատեսների լուսանկարների և տեսանյութերի հիման վրա պարզել է Astra-ն, օդային հարձակման ժամանակ պայթյուններ են որոտացել բնակելի թաղամասերում (Հունվարի 25-ի, Ճարտարապետ Տրոիցկու և Ուրիցկու փողոցներում)։ Մասնավորապես, վերջինում վնասվել է «Ուրիցկի» բնակելի համալիրը, որը շահագործման էր հանձնվել մեկ տարի առաջ։ Բացի այդ, դրոններից մեկը հարվածել է Կոլցովսկայա փողոցում գտնվող «Գալերեա Չիժովա» բիզնես կենտրոնին։ Դրա կայքում նշվում է, որ 25-հարկանի բարձրահարկը «ծառայում է որպես քաղաքի կենտրոնի գլխավոր ճարտարապետական դոմինանտներից մեկը»։ Բացի այդ, 45-րդ Հրաձգային դիվիզիայի փողոցում այրվել է առնվազն տասը ավտոմեքենա։

Մինչ այդ Ուկրաինայի զինված ուժերը (ՈւԶՈւ) հարվածներ էին հասցրել Վորոնեժին հոկտեմբերի 23-ին։ Այդ ժամանակ դրոնները հարձակվել էին «Բալտիմոր» ռազմական օդանավակայանի վրա։