Ավտոբուսի վթարի հետևանքով վնասվածք ստացածներից մեկի վիճակը ծանր է, երկուսինը՝ միջին ծանրության

Աճառյան փողոցում տեղի ունեցած ավտոբուսի վթարի հետևանքով վնասվածք ստացածներից մեկի առողջական վիճակը գնահատվում է ծանր, երկուսինը՝ միջին ծանրության:
Մյուս 8 տուժածները հետազոտվել են, ստացել անհրաժեշտ առաջին բուժօգնությունը և դուրս գրվել։

Այս մասին 24News-ին հայտնում են Առողջապահության նախարարությունից:

Հիշեցնենք՝ այսօր Երևանի Աճառյան փողոցում «Hyundai» մակնիշի ավտոբուսը դուրս էր եկել երթևեկելի գոտուց և կողաշրջվել։ Վթարի հետևանքով 11 մարդ էր տուժել, բոլորը՝ օտարերկրացիներ։

Տուժածներից 7-ը տեղափոխվել էին «Քանաքեռ-Զեյթուն» բժշկական կենտրոն, մյուսները՝ «Սուրբ Գրիգոր Լուսավորիչ» ԲԿ։

Դեպքի առթիվ նախաձեռնվել է քրեական վարույթ՝ Քրեական օրենսգրքի 342-րդ հոդվածի 1-ին մասով։ Նշանակվել է դատաբժշկական փորձաքննություն, կատարվում է նախաքննություն։