Դատավորները առաջխաղացում չեն ուզում, որ չթիրախավորվեն․ «Ժողովուրդ»

«Ժողովուրդ» օրաթերթը գրում է. «Բարձրագույն դատական խորհուրդը հայտնվել է մտահոգիչ իրավիճակում։

«Ժողովուրդ» օրաթերթը տեղեկացավ, որ Վճռաբեկ դատարանի քաղաքացիական պալատում առկա է դատավորի 1 թափուր հաստիք, անհրաժեշտություն է առաջացել հայտարարել Վճռաբեկ դատարանում դատավոր նշանակվելու համար առաջխաղացման ենթակա դատավորների թեկնածուների ցուցակը համալրելու համար։

Եվ հիմա ԲԴԽ կազմը հայտնվել է տարակուսանքի մեջ։

Բանն այն է, որ Ազգային ժողով չեն կարողանում ներկայացնել 3 թեկնածու, որոնցից մեկին պատգամավորները կարող են ընտրել Վճռաբեկ դատարանի քաղաքացիական պալատի դատավորի պաշտոնին։ Այսինքն՝ մյուս երկուսը պետք է քաջ գիտակցեն, որ մտնում են պայքարի մեջ՝ ձևական կողմը պահելու համար։

«Ժողովուրդ» օրաթերթին լուրեր հասան, որ այն դատավորները, որոնք ամիսներ առաջ մեծ ցանկություն են ունեցել հայտնվել թեկնածուների շարքում, այսօր հրաժարվում են առաջ գնալու համար իրենց թեկնածությունները առաջարկել՝ հաշվի առնելով դատական համակարգի գլխին սպասվող գործընթացները։ Ավելին՝ լուրեր կան նաև, որ հավակնող թեկնածուներից ոմանք էլ բարեվարքության մասով Կոռուպցիայի կանխարգելման հանձնաժողով չեն ներկայացրել անհրաժեշտ թղթերը։ Եվ ահա ԲԴԽ-ն ստիպված է եղել երկրորդ անգամ հանդես գալ հայտարարությամբ՝ Վճռաբեկ դատարանի քաղաքացիական պալատում դատավորի 1 թափուր հաստիքի համար չափանիշներին համապատասխանող դատավորներին դիմել դեպարտամենտ։

«Ժողովուրդ» օրաթերթին հասած տեղեկությունների համաձայն՝ այս պահին մեկ թեկնածու է դիմել, որը, սակայն, դատավոր էլ չէ։

Կարճ ասած՝ Նիկոլ Փաշինյանի կողմից դատական համակարգի պարբերաբար թիրախավորումը մասնագիտական շրջանակներում նվազեցրել է դատավոր դառնալու հետաքրքրությունը»։