Դատարանը կքննի Ռոբերտ և Սեդրակ Քոչարյանների կալանքը երկարաձգելու միջնորդությունները

Հոկտեմբերի 20-ին Հակակոռուպցիոն դատարանը կքննի Ռոբերտ և Սեդրակ Քոչարյանների կալանքը ևս երկու ամսով երկարաձգելու վերաբերյալ դատախազության միջնորդությունները։

Ըստ դատախազության՝ հայր և որդի Քոչարյանները կարող են խոչընդոտել արդարադատությանը։ Մյուս կողմից՝ քննադատություն է հնչում առ այն, որ հանրությանը մինչ օրս չեն ներկայացվել կոնկրետ փաստեր, որոնք կհիմնավորեին նրանց կալանավորման անհրաժեշտությունը։

Նշվում է նաև, որ ՀՀ երկրորդ նախագահ Ռոբերտ Քոչարյանը, որպես պետական պահպանության ենթակա անձ, շուրջօրյա՝ 24/7 ռեժիմով, գտնվում է Պետական պահպանության ծառայության աշխատակիցների հսկողության ներքո։

Սեդրակ Քոչարյանի կալանքի հարցով դատական նիստը նշանակված է ժամը 18։00-ին՝ դատավոր Արամ Գրիգորյանի նախագահությամբ, իսկ Ռոբերտ Քոչարյանի հարցով նիստը կմեկնարկի ժամը 18։30-ին՝ դատավոր Վարդգես Ստեփանյանի նախագահությամբ։

Դատական նիստերը կանցկացվեն Թբիլիսյան խճուղի 3/9 հասցեում։