Ես ուզում եմ ամենայն հստակությամբ հայտարարել. անկարգnւթյուններ անողների և բոլոր նրանց նկատմամբ, ովքեր դիմում են բռնnւթյան, մենք կլինենք անկոտրում. Մակրոն

Ես ուզում եմ ամենայն հստակությամբ հայտարարել. անկարգություններ անողների և բոլոր նրանց նկատմամբ, ովքեր դիմում են բռնության, մենք կլինենք անկոտրում: Հոկտեմբերի 18-ին ժողովրդին ուղղված իր ուղերձում հայտարարել է Ֆրանսիայի նախագահ Էմանուել Մակրոնը, հաղորդում է France 24 պարբերականը։

«Սիրելի՛ հայրենակիցներ,

Այսօր երեկոյան ես դիմում եմ ձեզ բացառիկ լրջության պահին՝ այն ամենից հետո, ինչ տեղի ունեցավ երեկ Ֆրանսիայի բազմաթիվ քաղաքներում՝ ինչպես մայրցամաքային տարածքում, այնպես էլ մեր անդրծովյան տիրույթներում:

Հոկտեմբերի 17-ին ծայրահեղ ձախ ռադիկալների խմբերը, որոնց միացան բազմաթիվ իրավախախտներ, աննախադեպ բռնություններ իրականացրին մեր քաղաքների փողոցներում:

Խանութները թալանվեցին, հասարակական շենքերն ու քաղաքապետարանները ենթարկվեցին հարձակումների, դրանցից մի քանիսը ավերվեցին: Մեր իրավապահ ուժերը բախվեցին արտակարգ դաժանության:

Այսօր երեկոյան մենք բոլորս զայրույթ և ամոթ ենք զգում: Անտանելի է տեսնել մեր քաղաքների փողոցները նման վիճակում: Ինչպե՞ս կարող են ֆրանսիացիները նման կերպ վարվել Ֆրանսիայի հետ:

Ազգի անունից ես իմ աջակցությունն եմ հայտնում մեր ոստիկաններին, ժանդարմներին և անվտանգության ուժերի բոլոր աշխատակիցներին, ովքեր կատարեցին իրենց պարտքը բացառիկ բարդ հանգամանքներում:

Բայց մենք երբեք չպետք է շփոթենք օրինական սոցիալական պահանջներ ներկայացնող քաղաքացիներին նրանց հետ, ովքեր ավերում են, ջարդում և թալանում:

Ես հասկանում եմ ֆրանսիացիների մտահոգությունը կյանքի թանկացման, ինչպես նաև երիտասարդության, ուսանողների և նրանց ընտանիքների առջև ծառացած դժվարությունների հետ կապված: Այս պահանջները պետք է լսելի լինեն:

Այնուամենայնիվ, ոչինչ չի արդարացնում բռնությունը:

Ես ուզում եմ ամենայն հստակությամբ հայտարարել. անկարգություններ անողների և բոլոր նրանց նկատմամբ, ովքեր դիմում են բռնության, մենք կլինենք անկոտրում: Լսելու և երկխոսություն վարելու պատրաստակամությունը չի նշանակում ոչ թուլություն, ոչ էլ անպաժելիություն:

Ես հանձնարարել եմ կառավարությանը տեղի ունեցածից անել բոլոր անհրաժեշտ հետևությունները, այդ թվում՝ հետախուզական տեղեկատվության, նման իրադարձությունների նախապատրաստման և կանխարգելման հարցերում:

Ես ակնկալում եմ հստակ պատասխաններ: Բոլոր հանգամանքները պետք է պարզվեն լիակատար թափանցիկությամբ:

Պրեֆեկտները քաղաքապետերի հետ համատեղ կայացնելու են անհրաժեշտ որոշումներ մեր քաղաքները, հասարակական շենքերը և ձեռնարկությունները պաշտպանելու համար: Անհրաժեշտության դեպքում այս միջոցները կարող են ներառել առանձին հավաքների արգելք:

Միևնույն ժամանակ, մենք պարտավոր ենք ապահովել, որ քաղաքացիների օրինական պահանջները լսվեն:

Ես հանձնարարում եմ վարչապետին խորհրդակցություններ կազմակերպել քաղաքական կուսակցությունների, արհմիությունների, երիտասարդության ներկայացուցիչների և այլ հասարակական կազմակերպությունների հետ՝ կոնկրետ առաջարկություններ մշակելու համար:

Կառավարությունը պետք է նաև մոբիլիզացնի օգնությունը անկարգություններից տուժածներին և աջակցություն ապահովի նրանց, ում ձեռնարկություններն ու գույքն ավերվել են:

Ֆրանսիային անհրաժեշտ են կարգուկանոն, հանգստություն և միասնություն: Մենք պետք է պաշտպանենք hանրապետությունը, ապահովենք քաղաքացիների անվտանգությունը և միաժամանակ պահպանենք ժողովրդավարական երկխոսության հնարավորությունը:

Բռնությունը չի կարող որոշել մեր երկրի ապագան:

Մենք պետք է գործենք միասին, պատասխանատու կերպով և վճռականորեն»,- ասել է Մակրոնը: