Մշակութային ժառանգությունը վերացվում է, իսկ իշխանությունը աչք է փակում. Արտակ Բեգլարյան

COP17-ը նաև Արցախի ժողովրդի իրավունքների մասին է, որովհետև տարածաշրջանում ամենատուժած բնիկ ժողովուրդը Արցախի հայ ժողովուրդն է: Այս մասին, այսօր՝ հոկտեմբերի 15–ին, կառավարության շենքի մոտ արցախցիների բողոքի ակցիայի ժամանակ հայտարարեց Արցախի Հանրապետության նախկին ՄԻՊ և պետնախարար Արտակ Բեգլարյանը։

«Այս պայմաններում, երբ նմանատիպ համաժողով է իրականացվում Հայաստանում, սակայն Արցախի ժողովրդի հարցերը, իրավունքները լրիվ անտեսվում են և մի բան էլ լեգիտիմացվում են ադրբեջանական ցեղասպանական հանցագործությունները մեր հանդեպ, բնականաբար խիստ անընդունելի է։ Մենք այստեղ ենք բարձրաձայնելու, որ մենք չենք մոռանում մեր իրավունքները և պայքարում ենք մեր վերադարձի իրավունքի համար, մեր մշակութային ժառանգության պաշտպանության համար, մեր կենսաբազմազանությունը պաշտպանելու համար, որի անբաժանելի բաղադրիչը հենց բնիկ ժողովուրդն է։

Նույն COP17-ի օրակարգային հարցերից մեկը բնիկ ժողովրդի և տեղական համայնքների հարցերի բարձրացումն է, իրավունքների պաշտպանությունն է, որի հիմնաքարը, բնականաբար, մեր պարագայում վերադարձի իրավունքն է, այնինչ ոչ միայն մեր վերադարձի իրավունքը չի պաշտպանվում, այլև հյուրընկալ երկրի իշխանությունները, մեզ ասում են՝ մոռացեք ձեր վերադարձի մասին։ Ոչ միայն մեր կենսաբազմազանությունը չի պաշտպանվում, այլև Ադրբեջանը ոչնչացնում է մեր բնությունը և մեր կենսաբազմազանությունը այնտեղ, և նաև ոչնչացնում է մեր մշակութային լանդշաֆտը, բնական լանդշաֆտի հետ համատեղ, իսկ մշակութային լանդշաֆտը ՄԱԿ-ի համապատասխան նորմերով անբաժանելի է բնական լանդշաֆտի հետ։

Իսկ մշակութային լանդշաֆտը ոչ միայն եկեղեցիներն են, այլև մեր ոչ նյութական մշակութային ժառանգությունն է, որը ոչնչացվում է նաև մեր բռնի տեղահանման հետևանքով»,– հայտարարեց նա։ Արտակ Բեգլարյանը հավելեց, որ ցավոք նաև նյութական մշակութային ժառանգությունն է ոչնչացվում, իսկ Հայաստանի իշխանությունները ոչ միայն աչք են փակում, այլև տարբեր հայտարարություններով լեգիտիմացնում են եկեղեցիների և այլ մշակութային հուշարձանների ոչնչացումը, իսկ միջազգային հանրությունը և անտեսում է և նաև միջազգային դիտորդ մարմիններ չի ուղարկում բռնազավթված Արցախ, որպեսզի հնարավորինս կանխեն հետագա հանցագործությունները։

«Սրանք միջանկյալ գործողություններ են, որպեսզի մեր կենսաբազմազանությունը պաշտպանված լինի, մեր մշակութային ժառանգությունը պաշտպանված լինի, մինչև մեր վերադարձը՝ միջազգային պաշտպանության ներքո մեր բնիկ հայրենիք։ Միայն այդ ժամանակ Արցախում կենսաբազմազանությունը պաշտպանված կլինի և մեր ժողովրդի իրավունքները վերականգնված կլինեն, և դրա հիման վրա մենք կկարողանանք ունենալ խաղաղություն, արժանապատիվ հիմունքներով։

Այլապես միջազգային հանրության բոլոր ներկայացուցիչները պետք է հաշվի առնեն, որ տարածաշրջանում խաղաղություն չի լինելու, ալիևյան ցեղասպանական ռեժիմը շարունակելու է հայատյացության և ցեղասպանական հանցագործությունները և մեր ժողովրդի և մարդկության դեմ»,– հայտարարեց նա։